«Առաջին լրատվական»-ը Հայաստանի Պահպանողական կուսակցության նախագահ Միքայել Հայրապետյանին խնդրեց մեկնաբանել, թե ո՞րն է լինելու վերջերս ստեղծված «Վերնատուն» ակումբի առաքելությունը, ի՞նչ կարող է այն փոխել Հայաստանի ներքաղաքական կյանքում։ Չէ՞ որ այնտեղ մեկտեղվել են անցյալում տարբեր դերակատարում ունեցած և նախկին համակարգը խորհրդանշող անձինք։
«Պարոն Վազգեն Մանուկյանի «Վերնատանը», այո, հավաքվել են տարբեր դերակատարում ունեցած և ունեցող անձինք: Եթե անգամ իմ շահերից չի բխում, պարտավոր եմ արդարամիտ լինել. այնտեղ միայն նախկին համակարգը խորհրդանշող անձինք չէին՝ դատելով ֆեյսբուքյան լուսանկարներից, կամ՝ ավելի շատ չէին, քան ներկա իշխանության մեջ: «Վերնատան» ճիշտ նույն գործառույթներով մեկ-երկու կառույցներ էլ են տարբեր ժամանակներում գործել ՀՀ-ում, որոնք քաղաքական պրոյեկտներ են առաջարկել: Դա քաղաքականությամբ զբաղվելու կարգաբանական մեկ աստիճան ավելի բարձր և քաղաքակիրթ մշակույթ է, քան այն, ինչին վարժված ենք: Կառույցի հիմնական առաքելությունը, վստահ եմ, լինելու է քաղաքական միջնորդությունը (եթե կուզեք՝ դալալությունը, ինչպես ընկերներիցս մեկը դիպուկ բնորոշեց)՝ ձևավորված գործիչների, թիմի կամ թիմերի տեսքով: Իսկ թե «Վերնատունը» կհաջողի՞ Հայաստանի ներքաղաքական կյանքում ազդեցիկ լինել, օրակարգեր թելադրել, փոփոխությունների հասցնել, իշխանություն փոխել՝ կախված է պարոն Մանուկյանի առաջ քաշելիք պրոյեկտի իրատեսականությունից, նաև այդ մեծ միջնորդախաղում անցնող-դարձողների՝ քաղաքական հետաքրքրություններ ու ամբիցիաներ ունեցողների ճկունությունից: Իսկ որ պարոն Մանուկյանը ծանր քաշային քաղաքական մտածող ու խաղացող է՝ ինձ թույլ չեմ տա վիճարկել: Տեսանողները հավանաբար արդեն իսկ նկատել են դրա հակամոդելների մրցապայքարը, որն առաջիկայում առավել կերևակվի»,- արձագանքեց Միքայել Հայրապետյանը: