Երկրաշարժից հետո Վանաձորի բնակչուհի Վեներա Հովակիմյանը ամուսնու հետ մեկնել է Գերմանիա: 2005-ին եկել է տեսակցության իր ընտանիքին՝ եղբորը, քրոջը, որոնք այդ ժամանակ ապրելիս են եղել Վանաձորում փայտե տնակում:
Վանաձորում որոշում են չորս ընտանիքի համար տներ գնել, սակայն մեկ տարի հետո տեսնում են, որ չեն կարողանում գոյությունը պահպանել, վաճառում են բնակարանները և 35000 ԱՄՆ դոլարով Նորագյուղում անմխիթար վիճակում գտնվող մի տուն են գնում: Ինչից հետո առայսօր դատական քաշքշոցների մեջ են:
Ցույց տալով փաստաթղթերը՝ նա նշեց, որ անհատ ձեռներեց բրոկեր Աննա Մելքոնյանի միջնորդական պայմանագրով կազմակերպել են առք ու վաճառք, կնքվել է պայմանագիր և նոտարի մոտ հաստատվել:
Սակայն որոշ ժամանակ անց, երբ Նորագյուղի տների սեփականաշնորհման հարցն ակտուալացել է, նախկին տերը՝ Սերոժ Հակոբյանը՝ Գելո մականունով, եկել և գրանցվել է իր նախկին տանը և սկսել ամեն գնով հետ բերել նախկին տունը՝ ընդհուպ դատական պրոցես սկսելով:
«Առաջին լրատվական»-ի հետ զրույցում Վեներա Հակոբյանը նշեց, որ Սերոժ Հակոբյանի դուստրն աշխատում է Սահմանադրական դատարանում՝ Վոլոդյա Հովհաննիսյանի մոտ, վերջինս էլ հովանավորում է Գելոյի ընտանիքին:
«Իմ հիվանդ ընտանիքի նկատմամբ ճնշում են գործադրել, հինգ հաշմանդամ կան ընտանիքում, որոնք երկրաշարժի հետևանքով են հաշմանդամ դարձել, քույրս լավ չի քայլում, եղբայրս նույնպես, մյուս եղբորս հոգեկանն է խանգարվել երկրաշաժից հետո, երեխան կույր է… դրանից ավելի ինչ լինի, ուր տանել իրենց»,- ասաց Վեներա Հովակիմյանը՝ հավելելով, որ քաղաքապետարանում իրեն ասել են, որ այս գործում Հակոբյանների ընտանիքին աջակցում է Մհեր Սեդրակյանը՝ Թոխմախի Մհերը, ով էլ կարողացել է քաղաքապետարանից Հակոբյանների համար բոլորովին վերջերս սեփականաշնորհման գրքույկ ձեռք բերել. «Այդ օրը երբ գնացի քաղաքապետարան, Տարոն Մարգարյանը չընդունեց մեզ, քարտուղարուհին իր կողմից մեզ բացիկ է տվել, որ շնորհավորում է բոլոր հայ ընտանիքներին կայունության և բարօրության օրվա համար: Հետ եմ վերադարձնում նրա բացիկը իրեն և ասում, որ ավելի լավ է օրենքով աշխատեիք, քան ընտանիք քայքայեք»,- ասաց տիկին Վեներան:
«Առաջին լրատվական»-ի հետ զրույցում քույրը՝ Վարդիթերը, պատմեց, որ ամեն օր գծագրողներ են բերում տուն, զանգում են, վիրավորում. «Զանգում է Լուսինեն, ինձ ասում է, դու չգիտես ինչ անօրինական երկրում ենք ապրում, դու գիտես 35 հազարով տան տեր պտի դառնայիր, ես մի զանգով ամեն ինչ կազմակերպում եմ»,- պատմեց քույրը:
Քույրերը նշեցին, որ այս խարդախության գլխավերևում կանգնած է Մհեր Սեդրակյանը, ով մոտ է Գելոյի հետ, աջակցում է նրան այս հարցում, վերջինս մի քանի անգամ գաղութ է ընկել և կոչվում է «գաղութի գել»:
