Եվրամիությունը կարող է հրաժարվել Ռուսաստանի դեմ նոր պատժամիջոցներից մեծ բիզնեսի լոբբինգի պատճառով՝ գրում է The Financial Times-ը: Ընկերությունները եվրոպական կառավարություններին նախազգուշացնում են, որ Կրեմլի կողմից ցանկացած պատասխան միջոցառում իրենց թանկ կարժենան: Զգուշավոր քաղաքականության կոչ են անում մասնավորապես BASF, Eni և BP ընկերությունները՝ ասվում է հոդվածում:
«Ցանկանո՞ւմ են նրանք մահանալ հանուն Ուկրաինայի: Չեմ կարծում»,- հայտարարել է բարձրաստիճան եվրոպացի պաշտոնյան և հավելել, որ Ռուսաստանի դեմ պատժամիջոցների ներմուծման համար պահանջվում է ԵՄ 28 պետությունների համաձայնությունը:
Իր հերթին Time-ը գրում է, որ պատժամիջոցները Ռուսաստանին ավելի թանկ կարժենան, քան ԱՄՆ-ին: Փորձագետներից մեկի խոսքով՝ եթե ԱՄՆ-ի թիրախը դառնան ռուսական 4 առաջատար բանկերը, ապա Վաշինգտոնին կհաջողվի զգալիորեն վնասել Ռուսաստանի տնտեսությանը:
The New York Times-ն իր հերթին նշում է, որ ռուսական տնտեսության վիճակը վատացել էր դեռևս մինչև պատժամիջոցների ներմուծումը: Թերթը մասնավորապես ուշադրություն է դարձնում սղաճին, տնտեսական աճի լճացմանը, ինչպես նաև ռուբլու և ֆոնդային շուկայի անկմանը:
The South China Morning Post-ն էլ գրում է, որ Մոսկվան Արևելքում նոր ներդրողներ է փնտրում՝ փորձելով պատժամիջոցների սահմանումից հետո Արևմուտքին հակակշիռ գտնել:
