10 տարի շարունակ Հովիկ Աբրահամյանի պատճառով փողոցում հայտնված բնակիչները նրա վարչապետ նշանակվելուց հետո էլ հույս չունեն, որ մի օր կկարողանան սեփական բնակարանն ունենալ: Նրանք փողոցում են հայտնվել այն պատճառով, որ իրենց բնակարանների տարածքը պետական կարիքների համար վերցվել է իրենցից, իսկ տեղում կառուցվել է Hotel National հյուրանոցային համալիրը, որը և՛ տուժած բնակիչների, և՛ մամուլի փաստմամբ՝ պատկանում է Հովիկ Աբրահամյանին:
Բնակարանները քաղաքացիներից վերցվել են, և խոստում է տրվել, որ հյուրանոցի հետնամասում կատուցվող 9 հարկանի շենքում նրանց բնակարաններ կհատկացվեն: Խոստումից 10 տարի անց շենքի միայն արտաքին պատերն են կանգուն և աստիճանները: Չկա ո՛չ էլեկտրաէներգիա, ո՛չ ջուր, ո՛չ վերելակ, ո՛չ դռներ ու պատուհաններ: Այս պարագայում տարբեր գերատեսչությունների կողմից, այդ թվում՝ Երևանի քաղաքապետ Տարոն Մարգարյանի, բնակիչներին ակտեր են տրվել, որ շենքի շինարարությունն ավարտված է և պատրաստ է շահագործման համար:
Շենքում միայն 8-րդ հարկաբաժինն է պատրաստ, որը, մեր զրուցակից բնակիչների խոսքով, պատկանում է Հովիկ Աբրահամյանի որդուն՝ Ծառուկյանի փեսա Արգամ Աբրահամյանին:
Մի քանի շաբաթ առաջ բնակիչները հավաքվել էին նախագահական նստավայրի դիմաց և պահանջում էին լուծում տալ իրենց խնդրին, անգամ նամակ հանձնեցին նախագահին, սակայն օրերս նախագահականից բանավոր պատասխան են ստացել, որ իրենք իրավասու չեն, չեն կարող խնդրին լուծում տալ:
Այսօր բնակիչներից մի քանիսն արդեն հավաքվել էին իրենց կիսակառույց շենքում և հուսահատված քննարկում էին, թե էլ ուր, էլ ում, էլ որ գերատեսչությանը դիմեն: «Էսպես չի լինի, արդեն 10 տարի է, մի մասը մահացավ, մի մասը թողեց-գնաց էս երկրից….»,- ասում էին նրանք:
Մեր նկարահանման պահին հավաքված բնակիչներին մոտեցավ մի երիտասարդ և կանչեց ներքև՝ շինարարությունը վերահսկողի հետ զրուցելու: Ինչպես ավելի ուշ պարզվեց, այդ անձը բնակչին ասել էր, որ գա և տեսախցիկի առաջ ասի, որ իրեց խոստացել են առաջիկա 20 օրվա մեջ սկսել շինարարությունը և հաջորդ 2 ամսվա մեջ ավարտել:
Բնակիչը՝ Լևոն Պետրոսյանը, նրան խնդրել էր, որ ինքն այդ խոստումը մեր տեսախցիկի առաջ տա, սակայն նա հրաժարվել էր: «Ես այդպիսի բան չեմ կարող տեսախցիկի առաջ խոստանալ»,-ասել էր «պրարաբը»:
Այնուամենայնիվ, մենք փորձեցինք զրուցել հիշյալ անձի հետ: Նա, ում անունը Էդգար Մանուկյան էր և ներկայացավ որպես շինարարության տնօրեն, ոչ տեսախցիկի առաջ վերահաստատեց բնակչին տրված խոստումը: «Ես կարգադրություն եմ ստացել առաջիկա 20 օրվա մեջ սկսել շինարարությունը, և հիմա մենք կազմակերպում ենք շինանյութի տեղափոխումը դեպի շենք: 20 օր հետո կարող եք գալ և անձամբ համոզվել, որ շինարարությունը վերսկսվել է»,-ասաց Էդգար Մանուկյանը:
Բնակիչների համար, սակայն, այս խոստումը միայն ծիծաղ հարուցեց: «Այդպիսի խոստումներ արդեն 9 տարի է՝ լսում ենք, բայց կսպասենք, 20 օրից նորից կգանք, տեսնենք՝ ինչքանով են իրենց խոսքի տերը»,- ասաց Լևոն Պետրոսյանը:
