Այսօր ՀՀ ճարտարապետների միությունում տեղի ունեցավ ՀՀ հանրային խորհրդի՝ տարածքային կառավարման և տեղական ինքնակառավարման հարցերով հանձնաժողովի նիստը, որի օրակարգում տարածքային զարգացման հայեցակարգի քննարկումն էր։ Քննարկմանը ներկա հասարակական կազմակերպությունների և նախարարությունների ներկայացուցիչներին հայեցակարգը ներկայացրեց ՀՀ տարածքային կառավարման նախարարության բաժնի պետ Աշոտ Սարգսյանը, ով նշեց, որ նման հայեցակարգ ստեղծելու գաղափարը պատկանում է հենց Տարածքային կառավարման նախարարությանը։ Ա. Սարգսյանի մեկնաբանմամբ՝ հայեցակարգը մշակվել է ամբողջ Հայաստանի Հանրապետության տարածքով համաչափ զարգացած տնտեսություն, բնապահպանություն ձևավորելու նպատակով։
«Այսուհետ տարածքային համաչափ զարգացման, գյուղերում մարդկանց բարեկեցության հարցը լինելու է նախարարության գերակա խնդիրներից մեկը»,- նշեց նախարարության ներկայացուցիչը՝ տեղեկացնելով, որ հայեցակարգը դեռ ձևավորման փուլում կլինի մինչ 2014 թ., սակայն հույս հայտնեց, որ մինչ այդ շատ հարցեր արդեն լուծված կլինեն։ Քննարկմանը ներկա մարզերից բազմաթիվ ներկայացուցիչներ քննարկումը ձևական համարեցին, քանի որ, նրանց կարծիքով, այսպիսի հայեցակարգերի քննարկմանը պետք է ներկա լինեն նախարարության այնպիսի ներկայացուցիչներ, որոնք իրենց մասնակցությունն են ունենում հայեցակարգի մշակման գործընթացին, իսկ Ա. Սարգսյանը միայն կատարածու է։
«Ավելի նեղ քննարկման ժամանակ համոզվեցինք, որ տարածքային համաչափ զարգացվածության խնդիրը ավելի շուտ պետք է լիներ մեր ուշադրության կենտրոնում, սակայն այժմ հայեցակարգն արդեն ուսումնասիրված և գնահատված է։ Այն կնվազեցնի այս կամ այն նախարարի, գյուղապետի կամ քաղաքական գործչի կողմնապահությունը որևէ տարածաշրջանի նկատմամբ»,- ընդգծեց ՀՀ հանրային խորհրդի տարածքային կառավարման և տեղական ինքնակառավարման հարցերով հանձնաժողովի նախագահ Կորյուն Առաքելյանը, ով, սակայն, լավատես չէ, թե այս հայեցակարգի կատարմամբ կվերանան անհամաչափ զարգացած տարածքներում բնակվող մարդկանց խնդիները։