Արտակարգ իրավիճակների նախարարությունը պատասխանատու չէ նորակառույց շենքերի սեյսմակայունության համար: Այս մասին այսօր Արմատ ակումբում տեղի ունեցած մամուլի ասուլիսի ժամանակ հայտարարեց ԱԻՆ «Սեյսմիկ պաշտպանության ազգային ծառայություն» գործակալության պետ, երկրաբանական գիտությունների թեկնածու Հրաչյա Պետրոսյանը:
Ընդ որում, պարոն Պետրոսյանն ասուլիսի ժամանակ հակասեց ինքն իրեն՝ սկզբում հայտարարլով, որ Հյուսային պողոտայի շենքերը կառուցված են բարեխղճորեն և կարող են դիմանալ 9 բալանոց երկրաշարժին, ապա ասելով, որ իրենք ընդհանրապես ընդգրկված չեն նորակառույցների հետ կապված որևէ գործընթացում և ոչ մի պատասխանատվություն չեն կրում դրանց համար:
«Բարձրահարկերը կառուցվում են բավականին բարեխիղճ ձևով, ցեմենտը որակով է, ամրանները նորմալ են, և այդ նորակառույց բարձրահարկ շենքերը կարող են դիմանալ 9 բալանոց երկրաշարժի ազդեցությանը: Կառուցողը լիցենզավորված կազմակերպություններն են, բայց լիցենզիաները տրվում են քաղաքաշինության նախարարության կողմից, իսկ կառուցման ընթացքը վերահսկում է նույն նախարարության կազմում գտնվող տեսչությունը: Այս գործընթացից սեյսմիկ պաշտպանության ազգային ծառայությունը դուրս է թողնված, կամ դուրս է մնացել, և մենք կցանկանայինք, որ մեր մասնագետներին նույնպես ընդգրկեն բազմաբնակարան շենքերին առնչվող գործընթացներին՝ սկսած նախագծումից, կառուցումից և հետագայում նաև շահագործումից, որովհետև ստացվում է, որ այդ ամենը արվում և վերահսկվում է նույն գերատեսչության կողմից:
Մենք պատասխան ենք տալու այդ ոլորտի համար, բայց մենք չունենք համապատասխան լծակներ, որ այսօր կիրառենք և հետո կարողանանք ասել, որ մենք հետազննել ենք, եզրակացություն ենք տվել, մենք տեր ենք կանգնում»,- ասաց Պետրոսյանը:
«Առաջին լրատվական»-ի այն հարցին, թե ո՞վ է պատասխանատու Հյուսիսային պողոտայի այսօրվա վիճակի համար (շենքերի պատերը քանդվում են), Պետրոսյանն ասաց. «Ով, որ կառուցել է, նա էլ պատասխանատվություն է կրում: Եթե մենք չենք մասնակցել իմ ասած աշխատանքներին և փուլերին, մենք ի՞նչ պատասխան տանք: Պատասխան կտան նրանք, ովքեր կառուցել են, նրանք, ովքեր լիցենզիա են տվել, նրանք, ովքեր ընդունել են: Հիմա բոլոր աշխատանքները կատարում են տարբեր կառույցներ, որոնք նույն նախարարության կազմում են: Պետք է վերահսկողություն լինի մեկ այլ նախարարության կողմից, ոչ թե այդ ամբողջ գործառույթը մի կենտրոնից ուղղորդվի, մի կենտրոնից վերահսկվի: Մոնոպոլիան, մենք գիտենք, որ ոչ մի լավ արդյունքի չի բերում»:
Պարոն Պետրոսյանն ասաց նաև, որ անկախ այն բանից, որ իրենք իրավասու չեն որևէ վերահսկողություն իրականցնել, իրենց մասնագետները հետաքրքրությունից դրդված երբեմն գնում են, կողքից նայում ու վստահեցնում, որ կառույցները սեյսմակայուն են:
«Նոր կառույցները մեր մասնագետները գնացել են, տեսել են, զննել են, բայց ոչ պաշտոնապես: Դե հետաքրքիր է: Եթե դուք ձեր կողքի բակում կառուցվող շենքը նայում եք, որպես քաղաքացի, ոչ որպես մասնագետ, ձեզ հետաքրքիր է, ձեզ ո՞վ կարող է բան ասել»,- ասաց Հրաչյա Պետրոսյանը:
