Քրեական գործի ընթացակարգը և դրանով իրականացվող օպերատիվ հետաքննության գործողությունները կարող են տարիներ տևել: Այդ մասին այսօր լրագրողական լսարանի հետ հանդիպման ժամանակ ասաց «Մարտի 1»-ի գործով քննչական խմբի ղեկավար Վահագն Հարությունյանը:
Անդրադառնալով youtube-ում անհայտ անձի կողմից տեղադրած այն կադրերին, որտեղ երևում էր, որ ոստիկանները կրակում են կոնկրետ ուղղությամբ, և անհրաժեշտություն կար պարզելու, թե ինչ զենքից են կրակում, և դրա հետ կապված նույնականացման և այլ մանրամասներ, Վ.Հարությունյանն ասաց, որ դրանք փորձաքննության համար պիտանի կադրեր չեն եղել:
Նաև տեղեկացրեց, որ դրանք ինտերնետում են հայտնվել կոնկրետ անձի անունով նշված հասցեից, որից, ինչպես հայտնի է դարձել հետո, շատ մարդիկ են օգտվում, և հասցեատերը դժվարացել է ասել, թե կոնկրետ ով կարող է տեղադրած լինել: Հարց հնչեց, թե «Արդյո՞ք գործընթացը փակուղի չի մտնում՝ հաշվի առնելով, որ կարծես ոչ մի բացահայտում չի լինում, տեսագրություններից ոչինչ պարզ չէ, հարցաքննվողները ոչ մի էական բացահայտում չեն անում»: Վ.Հարությունյանը պատասխանեց. «Նախաքննության համար չի կարող կիրառվել “փակուղի մտնել” տերմինը»: