Սիրիայում ահաբեկիչները երեկ սպանել են Ղամիշլիի Հայ կաթոլիկ համայնքի հոգևոր հովիվ Հովսեփ քահանա Պետոյանին և նրա հորը՝ Աբրահամ Պետոյանին: Նրանք սպանվել են Դեր Զորում, երբ սեփական ավտոմեքենայով մեկնել էին օգնություն ցուցաբերելու Դեր Զորում ապրող մի քանի հայ ընտանիքների և տեղեկանալու համայնքի կյանքի մասին:
Հայաստանի կողմից ի՞նչ քայլեր են ձեռնարկվում այդ ուղղությամբ․ «Առաջին լրատվական»-ի հարցին ԱԺ «Իմ քայլը» խմբակցության պատգամավոր Միքայել Զոլյանը պատասխանեց․ «Նախ, ես ուզում եմ ցավակցություն հայտնել զոհերի հարազատներին ու սիրիահայ համայնքին։ Ես կարծում եմ, որ այս ամենի պատասխանատվությունը կրում է թուրքական կառավարությունը, որը սանձազերծեց այդ ռազմական ագրեսիան Հյուսիսային Սիրիայում, ինչի հետևանքով «Իսլամական պետության» շատ գրոհայիններ ազատության մեջ հայտնվեցին։ Այս ահաբեկչությունը, թե կոնկրետ ով է կազմակերպել կամ իրականացրել, դժվար է ասել, որովհետև դա կարող էին լինել նաև պրոթուրքական ջոկատները, որոնք հետո մեղքը գցել են «Իսլամական պետության» վրա։ Երկու դեպքում էլ այս ամեն ինչը հավասարապես դատապարտելի է։ Մենք միշտ էլ ասել են, որ թուրքական այս արկածախնդրությունը շատ բացասական հետևանքներ է ունենալու։ Ճիշտ է՝ հայկական համայնքի հետ աշխատանքներ տարվում են, ամեն ինչ արվում է, որ մարդիկ հնարավորինս լինեն անվտանգության մեջ, բայց պարզ է, որ այնտեղ պատերազմական գործողություններ են ընթանում, և հարյուր տոկոսանոց անվտանգություն հնարավոր է միայն այն դեպքում, եթե նրանք տեղափոխվեն Հայաստան։ Սակայն մենք չենք կարող նրանց պարտադրել․ նրանք ի վերջո կապված են այդ շրջանի հետ։ Ամեն դեպքում մենք կապի մեջ ենք ու շարունակելու ենք աջակցել մեր հայկական համայնքին»։
Իսկ քաղաքագետ Արկադի Վարդանյանն էլ ասաց․ «Ես կարծում եմ, որ սա ռուս-թուրքական ագրեսիվ պահվածքի արդյունք է, որովհետև դրա հետևանքով մի քանի հարյուր գրոհայիններ հայտնվել են ազատության մեջ։ Այդ ողբալի միջադեպը, իհարկե, վկայում է «Իսլամական պետության» շարունակվող գոյատևության մասին։ Որքան ես գիտեմ՝ «Իսլամական պետությունը» ստանձնել է այդ պատասխանատվությունը, բայց չեմ կարծում, որ դա ուղղված էր Հայաստանի կողմից իրականացվող մարդասիրական գործողություններին, որոնց մասնակցում են ընդամենը մի քանի հոգի մեր մասնագետներից։ Այստեղ ես ավելի շատ տեսնում եմ աշխարհաքաղաքական զարգացումների արդյունքներից մեկը, և իմ կարծիքով՝ առաջին պատասխանատուն Ռուսաստանն ու Թուրքիան են, որոնք իրենց վճռական քայլերով փորձում են իրենց ձեռքը պահեն Մերձավոր Արևելքի տարածքում տեղի ունեցող զարգացումների զարկերակին»։
Մանրամասները՝ տեսանյութում։