Ապրիլի 13-ին Հանրապետական կուսակցության խորհրդի նիստում առաջադրվեց ՀՀ 13-րդ վարչապետը: Հովիկ Աբրահամյանի թեկնածությունն արդեն հաստատվել է:
«Առաջին լրատվական»-ի Realpolitik հաղորդաշարի հյուրն է սոցիոլոգ Ահարոն Ադիբեկյանը:
-Ինձ հետաքրքրում է՝ ընդհանրապես հասարակական կարծիքը, որպես այդպիսին, իշխանության գործերի, քայլերի համար, Ձեր դիտարկմամբ, նշանակություն ունենո՞ւմ է, թե՞ ոչ:
-Ընտրությունների ժամանակ դա վճռորոշ դեր ունի, ընդ որում՝ այն ակտիվ զանգվածը, որը մասնակցում է ընտրություններին, ընդհանուր ընտրողների 60-65 տոկոսն է, դրա կեսը ուղղակի չի ուզում որևէ փոփոխություն: Նա կայունության կողմնակից է, նրան պետք չէ, որ իշխանությունը փոխվի, ինչ-որ նոր ոստիկանապետ գա, հարկային տեսչության նոր պետ գա, էներգետիկայի նոր նախարար գա…
-Բոլորի հետ պայմանավորվել են, փողերը տվել են…
-Իրենք հարմարվել են, ամեն մեկը տարբեր եղանակներով՝ մի մասը դրսից գումար է ստանում, պետք է, որ երեխան սովորի, մտածում է, որ միայն պատերազմ չլինի, Ղարաբաղյան պատերազմը չվերսկսվի, և նրանք պահպանողական այն զանգվածն են, որը իշխանության հարատևման, իշխանության կայունության հենքն է: Պետք է մի այնպիսի կտրուկ ճգնաժամ լինի, և այնպիսի հմուտ կազմակերպիչ լինի, որ կարողանա ճգնաժամն օգտագործել իր օգտին:
Այդ առումով, նախագահական վերջին ընտրություններին ճգնաժամի նշույլները կային, բայց կազմակերպիչներ չեղան: Գիտենք, որ ընդդիմությունը մի կողմ կանգնեց, շուրջպարի կենտրոնում մնաց Րաֆֆի Հովհաննիսյանը, և նրա ռեսուրսները բավարար չէին, որ նա կարողանար հաղթել: Մենք կանխատեսում էինք, որ նրա 8 տոկոսին կգումարվի ևս 30 տոկոս, 8-ը նրա վարկանիշն է, ու նա այսքան տարիներին ունի, անկախ նրանից՝ մասնակցում, թե չի մասնակցում ընտրություններին, իսկ 30 տոկոսն էլ նրա վերին շեմն էր: Մոտ 13 տոկոս էր պակասում, և գուցե իշխանությունը գնար այդ ճանապարհով:
Երկրորդ՝ տիրող կուսակցությունն ավելի կազմակերպված է, չմոռանանք, որ 915 համայնքներից 700-ում ղեկավարը հանրապետականներն են, 100-ը թեպետ կոչվում են անկախ, բայց օգտվում են նրա աջակցությունից, կամ մի 50-60 ԲՀԿ-ից, մի 30 ՀՅԴ-ից, դա կարծես թե եղանակ չի ստեղծում: Ի՞նչ է նշանակում ունենալ գյուղապետ կամ քաղաքապետ. հիվանդ ես, երեխայի գումար կա, տեղի փող է պետք, սերմացու չկա, գայլերը հոշոտել են անասուններին…
-Դրանք տեղական բդեշխներն են:
-Չէի ասի: Բդեշխը միայն օգտվում է և հետևում: Նրանք մի քանի ֆունկցիան միասնական են նշանակում: Երբ մենք հարցումներ ենք անում գյուղում համաշխարհային բանկի պատվերով, գյուղապետին ուղղված իմ հարցին, թե՝ ինչու են քեզ ընտրել, ի պատասխան հնչեց՝ «որովհետև իմ մեքենայում միշտ բեզին կա, կարող է հիվանդին հասնել շտապօգնություն, ես կարող եմ միշտ մի քանի պարկ կարտոֆիլ տրամադրել, կարող եմ պարտքով գումար տալ»: Այսինքն՝ նա շտապօգնության ֆունկցիա է կատարում, որը գյուղը պահանջում է, բայց ոչ ոք դրանով չի զբաղվում: Այնպես որ, տեղական իշխանությունների վերահսկումը բավական մեծ ներուժ է, որ իշխանությունը իրեն վերարտադրի: