ՀԱԿ-ն ու ԲՀԿ-ն «time out» կվերցնեն: «Առաջին լրատվական»-ի հետ զրույցում այս մասին ասաց Մոսկվայի «Միաբանություն» կենտրոնի ղեկավար, վերլուծաբան Սմբատ Կարախանյանն ՝ անդրադառնալով ներքաղաքական զարգացումներին:
Նա նշեց, որ իշխանությունը փորձեց ընդդիմադիր դաշտի բարձրացրած բողոքը լիցքաթափել, ընդդիմադիր դաշտը քայքայել, մոտակա ժամանակաշրջանում հնարավոր ընդդիմադիր հզոր ալիքը թուլացնել և որոշ ճեղքումներ մտցնել՝ հիմնական թիրախում ունենալով ԲՀԿ-ին: Ըստ նրա՝ Հովիկ Աբրահամյանի նշանակումը կարող է համարվել բնական, սպասելի ու չեզոք: «Սկզբունքորեն ոչինչ չի փոխվում, որոշ տեղափոխումներ են տեղի ունենում, որոշ ներիշխանական ինտրիգներ, դերաբաշխումներ, գումարելիների տեղերը փոխելուց գումարը չի փոխվում: Կոռուպցիայի դեմ պայքարը, արտագաղթը կանգնեցնելը, տնտեսական ճգնաժամը վերացնելը, քաղաքական ճգնաժամը վերացնելը և ամենահիմնական խնդիրը պետականության խոր ճգնաժամը վերացնելը չի հաջողվելու այս համակարգի օրոք, Հայաստանն իր ազգային պետականության դեմքը սկսել է կորցնել: Այս իրավիճակում համարել, որ ԱԺ նախագահի նշանակումը վարչապետի պաշտոնում կարող է էական փոփոխությունների բերել, միամտություն է, ոչ մի հարց չի լուծվում»,- ասաց Սմբատ Կարախանյանը: Վերջինս նկատեց, որ Սերժ Սարգսյանը մեկ խնդիր է լուծում՝ նոր իրավիճակ է ստեղծում: Իսկ հիմնական ընդդիմադիր ուժերը, որոնք ունեն հստակ ծրագիր, քայլեր, ըստ նրա, պետք է վերանայեն իրենց ծրագրերը, ինչ-որ առումով միգուցե «թայմ աութ» վերցնեն, որովհետև նոր վարչապետը պետք է իր ծրագիրը ներկայացնի, բնական է, նրանք պետք է նայեն, թե ինչ ծրագիր է ներկայացվում կառավարության կազմի վերաբերյալ: «Ամենաէականը պետականության ճգնաժամն է: Այս իրավիճակում «թայմ աութ» կվերցնեն և կուսումնասիրեն նոր կառավարության ծրագիրը: Այս իրավիճակով նույնիսկ երկրում ներդրումների հարցը չի լուծվելու»,- նշեց Սմբատ Կարախանյանը:
Նա նշեց, որ եթե խոսենք, թե վարչապետի որ թեկնածուն էր ընդունելի Մոսկվայի համար, ապա ընդունելի էր Կարեն Կարապետյանը: Սակայն, ըստ նրա, էականն այն է, թե ինչպես ընդդիմությունը կարձագանքի երկրում ստեղծված նոր իրավիճակին, թեև եթե համակարգը չի փոխվում, համակարգը մնում է քրեաօլիգարխիկ համակարգ, մնում է աղքատությունը, մնում է արտագաղթը և ճգնաժամը:
