Եվրոպան և ԱՄՆ-ը թանկ կվճարեն Ուկրաինային դավաճանելու համար՝ գրում է The Wall Street Journal-ը: Թերթի կարծիքով՝ արևմտյան երկրները Կիևին թողել են Ռուսաստանի նախագահ Վլադիմիր Պուտինի ողորմությանը: Ուկրաինացի առաջնորդներն իրենց դավաճանված են զգում Բրյուսելի և Վաշինգտոնի կողմից՝ ասվում է հոդվածում:
Նշվում է նաև, որ Եվրոպան ու ԱՄՆ-ը հանդես եկան Ուկրաինայի իրավիճակի վերաբերյալ«անատամ» հայտարարություններով, և Ուկրաինայի բնակչությունը պետք է հասկանար, որ կարող է հույսը միայն սեփական ուժերի վրա դնել: «Մոսկվան եկել է նույն եզրակացության»,-նշում է պարբերականն ու հավելում, որ Արևմուտքի նման ընկալումը Ուկրաինայում ձևավորում է ներկայիս իրադարձությունները:
Հոդվածում ասվում է, որ յուրաքանչյուր հեղափոխությունից հետո վրա է հասնում «խումհար», և ուկրաինացիները սպասում էին խնդիրների, սակայն Ուկրաինայից Արևմուտքի հրաժարվելն անսպասելի հարված դարձավ՝ ընդգծել է թերթը:
The Independent-ն իր հերթին գրում է, որ Պուտինը կարող է մի քանի քայլ հեռու գտնվել ռուսական կայսրության վերականգնումից, սակայն այդպիսի գործողությունները կարող են Մոսկվային մղել «դիվանագիտական անկյուն»: Թերթի կարծիքով՝ Արևմուտքի կողմից ռազմական պատասխանը միանգամայն բացառված է, սակայն հաջորդ շաբաթ Ժնևի քառակողմ հանդիպմանն արևմտյան երկրները պետք է հստակ հայտարարեն, որ Կրեմլի գործողություններն արդարացում չունեն:
