Հայաստանի ժողովրդական կուսակցության նախկին անդամ Ռուզան Խաչատրյանը տևական ժամանակ Հայաստանում չի ապրում: Հայաստանից հեռանալու պատճառներից մեկը քաղաքական իրադարձություններն էին, ներքաղաքական վայրիվերումները, որոնց մասնակիցն է եղել նա: «Առաջին լրատվական»-ի հետ զրույցում Ռ. Խաչատրյանը հավաստիացրեց՝ հենց որ հնարավորություն է ստեղծվում, իսկույն Հայաստան է գալիս: Անդրադառնալով հարցին, թե անցնելով հետընտրական հուսախաբությունների միջով, արդյո՞ք չի ափսոսում, որ այդպիսի գին վճարեց, Ռ. Խաչատրանը պատասխանեց՝ երբեք. «Այդ գինը վճարեցի ես անձամբ, ինչպես նաև մեր սերունդը, որը պայքարում էր տարիներ շարունակ, և այսօր պայքարը հաղթանակով ավարտվեց: Անշուշտ, այն, որ մեր լուման էլ կա այդ հաղթանակի մեջ, մեզ ոգևորում է»:
ՀԺԿ-ում երբևէ Կարեն Դեմիրճյանի հետ խոսվե՞լ է Մեղրիի տարբերակի մասին՝ որպես բանակցային թեմա: Անդրադառնալով այս հարցին՝ Ռ. Խաչատրյանը նշեց, որ շատ կարճ ժամանակ է կարողացել շփվել Կ. Դեմիրճյանի հետ. «98թ. նախագահական խայտառակ ընտրություններից հետո որոշեցի դառնալ կուսակցության անդամ, լրագրողի համար դա շատ ծանր որոշում է, Կարեն Դեմիրճյանը վստահություն էր ներշնչում, բացի դրանից՝ հիմնականում անարդարություններն ինձ դրդեցին գնալ այդ քայլին… Մի քանի անգամ զրուցել եմ Կարեն Դեմիրճյանի հետ, բայց Մեղրիի թեմայով նա ինձ հետ չի խոսել: Բայց Հոկտեմբերի 27-ից հետո ես զրուցել եմ նրա վարորդի հետ և հոդված եմ գրել այդ թեմայով: Վարորդը պատմեց, որ Կարեն Դեմիրճյանը և Վազգեն Սարգսյանը բարկացած դուրս են եկել Անվտանգության խորհրդի նիստից՝ այլայլված դեմքով: Կարեն Դեմիրճյանը նստել է մեքենան և ասել. «Քշի՛ տուն, սրանք ուզում են Մեղրին տալ»:
Ռ. Խաչատրյանը ոճրագործությանը հաջորդած ժամանակահատվածում Հոկտեմբերի 27-ի գործով լրագրողական հետաքննություն է անցկացրել, և հավաքված նյութերը պաշտոնապես հանձնել է Հոկտեմբերի 27-ի գործով զբաղվող նախկին ԱԺ ժամանակավոր հանձնաժողովին: Ռ. Խաչատրյանի խոսքով՝ կարևոր է այդ օրն ԱԺ-ում վիրավորներին բուժօգնություն ցույց տվող բուժքրոջ հետ հարցազրույցը: «Նա ականատես է եղել, թե ինչպես է Կարեն Հունանյանը խոսել մեկի հետ, որը հենց ԱԺ նիստերի դահլիճի դռան ետևում է եղել: (Ի դեպ հենց այնտեղ է սպանվել Ռուբեն Միրոյանը, ով լսելով կրակոցները՝ դուրս էր եկել իր սենյակից՝ տեսնելու, թե ինչ է կատարվում ԱԺ դահլիճում): Կարենը հարցրել է՝ ո՞վ է, դռան ետևից ասել են՝ մենք ենք: Այսինքն՝ այդ հինգ ահաբեկիչներից բացի՝ եղել է առնվազն մեկ անձ ևս, եթե ոչ ավելին: Այդ բացահայտումից հետո բուժքույրը և բժշկուհին շատ արագ հայտնվեցին ԱՄՆ-ում: Իսկ հետո հայտնի դարձավ, որ այդ բուժքույրը կասկածելի պայմաններում մահացել է…»:
Մանրամասն՝ տեսանյութում: