Երևանի ընդհանուր իրավասության դատարանում մեկնարկել է ՊՎԾ նախկին պետ Դավիթ Սանասարյանի հայտնի գործի դատավարությունը: Ինչպես հայտնի է, Դավիթ Սանասարյանին ԱԱԾ-ն մեղադրում է կոռուպցիայի համար: Գործը սկսվել էր դեռևս Արթուր Վանեցյանի պաշտոնավարման շրջանում, երբ ԱԱԾ պետը պնդում էր, որ մեղադրանքը հիմնավոր է: Դավիթ Սանասարյանը հայտարարում է, որ մեղադրանքը շինծու է: Արթուր Վանեցյանի պաշտոնանկությունը չազդեց գործի վրա, և այն, այսպես ասած, չկարճվեց և հիմա դատավարության փուլում է:
Քաղաքագետ Գագիկ Համբարյանն այս գործը հետաքրքիր և կարևոր է համարում նաև քաղաքական տեսանկյունից։ «Առաջին լրատվական»-ի հետ զրույցում Համբարյանն ասաց՝ գործը ստացել է քաղաքական աստառ, որովհետև մեղադրյալը պատահական մարդ չէր՝ ՊՎԾ պետն էր, վարչապետ Փաշինյանի ամենամտերիմ մարդկանցից մեկը և, ինչպես մամուլն է գրում՝ վարչապետի թիմի «սորոսական» թևի ամենաակտիվ ներկայացուցիչներից մեկը. «Երբ գործը ձնագնդի նման աճեց ու դարձավ քրեական գործ՝ շատերը նշեցին, որ դա քաղաքական պատվեր է և սարքվել է ուժայինների կողմից։ Նույն Դավիթ Սանասարյանի ընկեր Դանիել Իոաննիսյանը բացահայտ մեղադրեց ԱԱԾ նախկին պետ Արթուր Վանեցյանին այս գործը Դավիթ Սանասարյանի գլխին սարքելու մեջ, ինչպես նաև կան մեղադրանքներ առողջապահության նախարարի հասցեին․ Ուստի, գործը, քաղաքական աստառ ստանալով, մտավ եզրափակիչ փուլ»։
Ըստ Համբարյանի՝ անկախ նրանից, թե ինչպիսին կլինի վճիռը, այն կմեկնաբանվի քաղաքական տեսանկյունից. «Եթե Դավիթ Սանասարյանը հաղթանակ տանի՝ քաղաքական տեսանկյունից դա կնշանակի, որ պարոն Փաշինյանի թիմի սորոսական թևը խոշոր հաղթանակ է տանում, գուցե պայմանավորեն նաև Փաշինյան-Վանեցյան սուր հարաբերություններով՝ առ այն, որ Սանասարյանին հաղթանակ շնորհելով՝ հարված կհասցվի Վանեցյանին, իսկ պարտության դեպքում՝ հակառակը կնշվի, որ սորոսական թևը պարտություն է կրում։ Ես երկրորդ վարկածը գրեթե բացառում եմ, համոզված եմ, որ Դավիթ Սանասարյանն անմեղ կճանաչվի ու կվերադառնա իր պաշտոնին»։
Մեր զրուցակիցը նշեց՝ եթե դատական պրոցեսն արդար ընթանա, ապա կարելի է այս գործը որպես լավ նախադեպ որակել՝ առ այն, որ քրեական գործ կարող է հարուցվել անգամ գործող պաշտոնյայի նկատմամբ։ «Բայց քանի որ գործող իշխանությունները որդեգրել են նախկինների գործելաոճն այն իմաստով, որ ամեն ինչ պետք է իրենց ծառայի՝ ես արդարադատության չեմ սպասում՝ հատկապես եթե կան մեծ շահեր ու դրանք վերաբերում են իշխանությունների ներսում գոյություն ունեցող տարբեր թևերին։ Եթե ես տեսնեմ, որ իշխանություններն իսկապես ցանկություն ունեն այդ վեթինգն իրականացնել՝ ես կհավատայի, բայց այդ վեթինգն այս պահին նշանակում է հետևյալը՝ նախկինում Սերժ Սարգսյանին ու ՀՀԿ-ին եք ծառայել, հիմա՝ մեզ։ Գրեթե բոլոր ոլորտներում այս քաղաքականությունն է տարվում, իրավապահ ոլորտում, արդարադատության ոլորտում ես ժողովրդավարացում չեմ տեսնում»,- եզրափակեց նա։
