2019 թվականի 9 ամիսների ընթացքում գրանցված հանցագործությունների ընդհանուր թվաքանակն աճել է 6,7%-ով կամ 1.192 դեպքով: Աճել են հատկապես գողությունները՝ ոչ մեծ ծանրության և ճանապարհային երթևեկության կանոնները խախտելու դեպքերի թվի աճով: Նկատելի աճ է արձանագրվել սեփականության դեմ ուղղված հանցագործությունների տեսակարար կշռում (45,9%-ից 50,6%)։ Այս վիճակագրությունը ներկայացվեց նախօրեին՝ հոկտեմբերի 19-ին տեղի ունեցած ոստիկանության ընդլայնված կոլեգիայի նիստում, որի ընթացքում ամփոփվեցին նաև ոստիկանության ծառայությունների և տարածքային մարմինների 2019 թվականի 9 ամիսների օպերատիվ-ծառայողական գործունեության արդյունքները։
Ըստ ոստիկանության հաղորդագրության՝ դեպքերի աճը կարելի է պայմանավորել նաև այն հանգամանքով, որ դեռևս նախորդ տարվանից, կապված իրավիճակի փոփոխության հետ, բարձրացել է քաղաքացիների վստահությունը ոստիկանության գործունեության նկատմամբ, և նրանք չեն խուսափում դիմել ոստիկանություն։ Եթե 2018 թ. 9 ամիսների ընթացքում ոստիկանության ստորաբաժանումներ ստացվել էր առերևույթ հանցագործության մասին 147․780 հաղորդում, ապա 2019 թ. 9 ամիսների ընթացքում դրանց թիվն աճել է 29.721-ով կամ 20,1%-ով՝ կազմելով 177.501:
Իրավապաշտպան Ժաննա Ալեքսանյանը բոլորովին այլ կարծիքի է։ Վերջինս բնավ համակարծիք չէ, որ երկրում հանցագործությունների բավականին լուրջ աճը, այն էլ ընդամենը 9 ամսվա կտրվածքով, պայմանավորված է հետհեղափոխական իրավիճակում ոստիկանության գործունեության նկատմամբ քաղաքացիների վստահության մակարդակի բարձրացմամբ։ «Այդ բացատրությունը տեղին չէ, ոստիկանությունը թերացումները պետք է փնտրի իր ներսում, իրենց աշխատանքներում։ Մենք ամեն օր տեսնում ենք, թե իրենք ոնց են աշխատում, մենք շարունակում ենք տեղեկանալ համակարգում բռնությունների մասին, դրսում՝ իրենց աշխատանքների թերացման մասին։ Իրենք շարունակում են չկողմնորոշվել իրենց աշխատանքում, իրենց պարտականություններում։ Գրեթե ամեն օր լսում ենք մի նոր սպանության մասին։
Հանրապետությունում քրեածին մթնոլորտի աճը լրջագույն խնդիր է, որից պետք է հետևություններ անել ու այդ մթնոլորտը վերացնելու ուղղությամբ քայլեր ձեռնարկել»,- «Առաջին լրատվական»-ի հետ զրույցում ասաց Ալեքսանյանը՝ հավելելով. «Այսօր ոստիկանության պակասն զգացվում է մեր երկրում, անվերահսկելիություն է, ամենաթողություն։ Լավ կլինի, որ ոստիկանությունը այլ պատճառաբանությունների փոխարեն սեփական թերացումները տեսնի և, վերացնելով այդ թերությունները, թերացումները, հանրապետությունում վերահսկելի վիճակ ստեղծի»։
Անդրադառնալով հարցին, թե ինչից է գալիս այս ամենաթող, անվերահսկելի վիճակը, ով է դրա թիվ 1 պատասխանատուն, իրավապաշտպանը նկատեց. «Չեմ կարող հստակ ասել, բայց անելիք ունի և քաղաքական ղեկավարությունը՝ հստակ պահանջներ դնելու և արդյունքներ պահանջելու մասով, և ոստիկանապետի ժամանակավոր պաշտոնակատարը և այլ պատասխանատուներ։ Մի բան հստակ է, այս ամենաթող վիճակին պետք է վերջ դնել, հետևություններ անել ու իրավիճակը դարձնել վերահսկելի, այլապես կարող ենք շատ լուրջ խնդիրների ու հետևանքների առաջ կանգնել»։
Հետհեղափոխական իրավիճակին կարող ենք բնորոշել թերևս միայն կոռուպցիոն բնույթի հանցագործության դեպքերի աճը։ Նախորդ 9 ամսվա ընթացքում արձանագրվել է նման 931 դեպք, որոնցից 255-ը կաշառակերության դեպքեր են, 151-ը՝ պաշտոնեական դիրքն օգտագործելով՝ յուրացման, 99-ը՝ պաշտոնեական կեղծիքի, 215-ը՝ պաշտոնեական լիազորությունները չարաշահելու, 51-ը՝ պաշտոնեական լիազորություններն անցնելու և այլն։ Նախորդ իշխանության ժամանակ նման 1-2 դեպքի կարելի էր հանդիպել պաշտոնական վիճակագրություններն ուսումնասիրելիս։
Ամեն դեպքում, խորհրդակցության ժամանակ ոստիկանության պետի ժամանակավոր պաշտոնակատար Արման Սարգսյանը, անդրադառնալով առանձին ծառայություններում առկա բացթողումներին ու կարգապահական խնդիրներին՝ ընդգծել է, որ համակարգում պետք է լինեն մարդիկ, որոնք իրենց ծառայությամբ պատիվ են բերում ոստիկանությանը և հույս հայտնել, որ ոստիկանության բոլոր ծառայությունները կշարունակեն հետևողական աշխատանքը հանցավորության դեմ պայքարն առավել արդյունավետ կազմակերպելու, կարգապահական ու ծառայողական կարգապահությունն ամրապնդելու ուղղությամբ։