«Թուրքիային ծանր դրության մեջ է դնում քրդերի բազմամարդությունը: Սրա մեղավորը իրենք են, քանի որ 16-րդ դարի սկզբից խրախուսեցին քրդերի, թուրքերի ներհոսքը Հայկական լեռնաշխարհ: Իրենք ընկան կրակի մեջ, նրանց միջոցով մեզ բնաջնջեցին, իսկ այսօր արդեն քրդերն են դարձել իրենց համար խնդիր: Իսկ քրդական շարժումը, որն օրեցօր թափ է առնում, դեմոգրաֆական աճի պայմաններում Թուրքիային դնում է ծանր կացության մեջ: Թուրքերը 20-րդ դարում հարց լուծելու մի տարբերակ գիտեին՝ ցեղասպանությունը: Բայց այսօր իրականացնել ցեղասպանություն 40 միլիոն ժողովրդի նկատմամբ, այն էլ ներկայիս աշխարհաքաղաքական իրողությունների պայմաններում, անկարելի է»,-անդրադառնալով Թուրքիայի Սիրիա ռազմական ներխուժմանը՝ «Առաջին լրատվական»-ի հետ զրույցում ասաց ԳԱԱ պատմության ինստիտուտի տնօրեն Աշոտ Մելքոնյանը:
Նրա խոսքով՝ Էրդողանը, ունենալով կայսերական մտածողություն, ջղածիգ գործողություններ է անում այս իրավիճակից դուրս գալու համար, միջանցքներ է փորձում ստեղծել, որոնք պետք է իրենց պատնեշեն քրդական շարժումներից այն պարագայում, երբ երկրի ներսում տասնյակ հազարավոր քրդեր են ապրում: «Ես կարծում եմ, որ Էրդողանը պահի ազդեցության տակ անում է անհեռատեսքայլեր, որոնք էլ վարկաբեկում են Թուրքիային համաշխարհային հանրության առջև, և ինքն էլ հաջողության չի հասնում: Թվում է, թե Ռուսաստանի հետ լեզու գտնելով նա կկարողանա իր խնդիրները լուծել: Բայց, ինչպես կյանքը ցույց է տալիս, Ռուսաստանը նույնպես լավ հասկանում է, որ, «դաշնակից» լինելով Թուրքիային, իրականության մեջ առաջ է մղում իր խնդիրը»: