Արվեստաբանները նկատել են, որ ԱՄՆ նախկին նախագահ Ջորջ Բուշ կրտսերի վրձնած՝ համաշխարհային առաջնորդների դիմանկարները հիմնված են Google Images-ով որոնումների արդյունքների վրա՝ հայտնում է InoPressa-ն՝ հղում անելով The Guardiane թերթին:
Երևում է՝ այդ նկարները ստեղծելիս Բուշն օգտվել է որոնման համակարգի միջոցով գտնված առաջին իսկ լուսանկարներից՝ գրում է բրիտանական պարբերականը:
Քննադատ Գրեգ Ալենն իր բլոգում գրել է, որ դիմանկարներից շատերն արտանկարված են եղել «Վիքիպեդիայի» հոդվածների նկարներից:
«Ակնհայտ է, որ նա չի դիմել լուսանկարների այն հսկայական պահոցին, որ ստեղծել են պրոֆեսիոնալները, որոնք 8 տարի ամեն օր հետևել են պետության ղեկավարներին»,- գրում է քննադատը:
Հիշեցնենք՝ անցած շաբաթ Դալլասում բացվել է ԱՄՆ նախկին նախագահ Ջորջ Բուշ կրտսերի գեղանկարների անհատական ցուցահանդեսը: Ցուցանմուշների շարքում են, մասնավորապես, ՌԴ նախագահ Վլադիմիր Պուտինի, Մեծ Բրիտանիայի նախկին վարչապետ Թոնի Բլեերի և Դալայ-լամայի դիմանկարները: Ջորջ Բուշը նշել է, որ նկարել է միայն այն քաղաքական գործիչներին, որոնց հետ ինքը համագործակցել է՝ որպես պետության ղեկավար:
