Այս պահին նախագահական նստավայրում ընթանում է ՍԴ նախագահ Գագիկ Հարությունյանի մամուլի ասուլիսը: Ինչպես ավելի շուտ պարզվեց, «Առաջին լրատվական»-ի լրագրողը չի կարող մասնակցել այս ասուլիսին և հարցեր ուղղել ՍԴ նախագահին:
Ընդ որում՝ մեր լրագրողի անունը երեկ գրանցված է եղել նախագահականում: Թե ինչու է նախագահականի հասարակայնության և տեղեկատվության միջոցների հետ կապերի վարչությունը նման կամայական որոշում կայացրել, անհասկանալի է: Սա, ի դեպ, առաջին դեպքը չէ, երբ նախագահականի վերոնշյալ վարչությունը խոչընդոտում է լրատվամիջոցների աշխատանքին: Ի վերջո՝ նախագահական նստավայրը պետական-հասարակական կառույց է, և որևէ մեկի տունը չէ, որ նման որոշումներն արդարացված լիեն:
Թե ինչ է թաքցնում նախագահականը՝ անհայտ է: Կատարվածն առավել անհասկանալի է մամուլի ազատության մասին Սերժ Սարգսյանի վերջին հայտարարությունների ֆոնին: Նշենք, որ «Լրագրողներ առանց սահմանների» կազմակերպության՝ «Մամուլի ազատություն 2014» զեկույցի հրապարակումից հետո, որտեղ Հայաստանը 180 երկրներից զբաղեցնում է 78-րդ տեղը, ՀՀ նախագահ Սերժ Սարգսյանն այսպիսի կարծիք էր հայտնել. «Մենք միշտ պետք է հիշենք, որ Հայաստանում արդեն ունենք մամուլի ազատության շատ բարձր աստիճան: «Լրագրողներ առանց սահմանների» կազմակերպությունը օրերս հրապարակեց աշխարհում մամուլի ազատության ցուցիչի վերաբերյալ 2014թ. զեկույցը, ըստ որի՝ Հայաստանի Հանրապետությունն առաջատար է մեր տարածաշրջանում՝ առաջ է իր բոլոր հարևաններից: Ըստ այդ զեկույցի` մենք մամուլի ազատությամբ գերազանցում ենք անգամ Եվրամիության որոշ երկրների, օրինակ՝ Հունաստանին, Բուլղարիային, էլ չեմ խոսում Վրաստանի, Ուկրաինայի և այլ երկրների մասին, որոնք համարվում էին ազատության, ժողովրդավարության կղզյակներ: Սա, իրոք, շատ լուրջ ձեռքբերում է: Եվ սա պատահական չի ստացվել: Մե՛ր ձեռքբերումն է»: