Հանրային խորհրդի նախագահ Վազգեն Մանուկյանը, որի ղեկավարած կառույցը կոչված է խորհրդատվություններով ապահովել կառավարությանը, օր օրի կառավարության, կառավարության ղեկավարի արտահայտած տեսակետների տրամագծորեն հակառակ տեսակետ է հայտնում։
Օրերս ազդարարելով «Վերնատուն» հասարակական քաղաքական ակումբի ստեղծման մասին, Վազգեն Մանուկյանը նշել էր, որ իշխանության վարած քաղաքականության հետևանքով Լեռնային Ղարաբաղի հակամարտության բանակցային գործընթացը մտել է փակուղի, ինչը մեծացրել է լայնամասշտաբ ռազմական գործողությունների վերսկսման հավանականությունը. բազմապատկվել են արտաքին քաղաքական մարտահրավերները։
Հակառակ սիրո և հանդուրժողականության խոստումների՝ հանրությանը սևերի ու սպիտակների, մերոնք-ձերոնքի բաժանումը ստեղծել է փոխադարձ ատելության մթնոլորտ։
Իսկ Սահմանադրական դատարանի դեմ ապօրինի հարձակումները, դատական համակարգի դեմ ոտնձգությունները, քննչական ու դատավարական պրակտիկայում երկակի ստանդարտների կիրառումը, ընտրովի «արդարադատությունը» բերում են մենիշխանության հաստատմանը. «Մարտի 1»-ի դատավարությունը քաղաքական հարթություն է տեղափոխվել:
Օրերս իր հերթական հարցազրույցներից մեկի ժամանակ Մանուկյանը կրկին անդրադարձել է Սահմանադրական դատարանի շուրջ ստեղծված իրավիճակին՝ նշելով, որ այն, ինչ այսօր տեղի է ունենում ՍԴ-ի շուրջ, ընդհանրապես իրավական շրջանակներից դուրս է։
ԳԽ պատգամավոր Ազատ Արշակյանը, «Առաջին լրատվական»-ի հետ զրույցում անդրադառնալով Մանուկյանի այս հայտարարություններին, նկատեց, որ եթե քաղաքական միավորի ղեկավարը քաղաքական հայտարարություններ է անում, ապա դա պետք է անի իր քաղաքական կազմակերպության անունից, հակառակ դեպքում դա շիզոֆրենիա է։ «Քաղաքական կուսակցությունը կարծիք ունի այս իրադարձությունների մասին, ինքն էլ այդ քաղաքական կուսակցության հիմնադիրն է, լիդերը, ցեղապետը, ապա պետք է այդ ուժի անունից հայտարարություն անի։ Դա կլինի բնական, սակայն հիմա դա չի արվում, և պետական պաշտոնյան իր ղեկավարին քննադատում է։ Դա էլ ղեկավարի հանդեպ գովք է, քանի որ դա խոսում է ղեկավարի հանդուրժողականության մասին»,- ասաց Արշակյանը՝ հավելելով, որ ամեն դեպքում Վազգեն Մանուկյանի առաջարկածը օրակարգից դուրս է, ուշացած. «Օրակարգից դուրս, աշխարհից կտրված, վերնատուն, ներքնահարկ, ընդհատակ, պենտհաուս…. անհասկանալի ու անհետաքրքիր օրակարգ է։ Հենա արդեն մի քանիսն ասում են՝ քաղաքական մի ուժ էլ կա, որ դա հայտարարում է, թող միանան դրանց»։
Մեր դիտարկմանը՝ երբ սահմանադրական մարմնի՝ Հանրային խորհրդի ղեկավարը կառավարության դեմ է դուրս գալիս ու սկսում քննադատել նրա գործունեությունը, դա ինչի՞ մասին է խոսում, և ինչ գնահատական պետք է տալ դրան, Արշակյանը պատասխանեց. «Խնդիրն այն է, որ Վազգեն Մանուկյանի կարծիքը մասնավոր կարծիք է։ Հանրային խորհրդում, խորհրդի անդամները չեն կիսում նրա կարծիքը։ Նրա կարծիքը անգամ իր կուսակցությունում չեն կիսում։ Նա չի կարող իր կուսակցությունում մի հարց դնել քվեարկության և անցկացնել։ Ճիշտ այդպես էլ հանրային խորհրդում։ Նա չի կարող այդ կարծիքը անցկացնել ոչ մի տեղ։ Նա փոքրամասնություն է։ Նա մարգինալ է, դրա համար էլ վեր է կացել ու հայտարարում է, թե պենտհաուս է կառուցում»։
Հարցին՝ մարգինալը, փոքրամասնությունը կարո՞ղ է լինել, շարունակել մնալ Հանրային խորհրդի նախագահ, Արշակյանը պատասխանեց. «Նա չգիտի, տեղյակ չի, որ որոշակի կարգավիճակ ունի և այդ կարգավիճակից բխում է որոշակի վարքագիծ։ Մտքով անցել է, կարծիք է հայտնել, ակումբ է բացում։ Բայց դա ոչինչ չի տա նրան։ Վազգեն Մանուկյանը լուսանցքում է, լուսանցքում՝ փախած տառերի պես, չտեղավորված ստորակետի պես, դուրս մնացած գծիկի պես։ Մարգինալը սա է։ Մարդը ադեկվատ չէ ուղղակի։ ԿԸՀ-ի ու ԱԺ-ի վրա գրոհ կազմակերպած մարդը կարո՞ղ է ադեկվատ լինել։ Նա հիմա ինչ էլ հայտարարի, այս կոնտեքստում է»։
