«Այս հայտարարության մեջ առկա է հանցակազմ, որովհետև հնչում է ուղղակի ֆիզիկական ոչնչացման սպառնալիք: Դա չի արդարացնում նաև մարդու, ենթադրենք, հերոսական անցյալը. օրենքի առջև բոլորը հավասար են»,- «Առաջին լրատվական»-ի հետ զրույցում ասաց քաղաքագետ Արա Պապյանը՝ անդրադառնալով Արցախի Ազգային անվտանգության խորհրդի նախկին քարտուղար Վիտալի Բալասանյանի կոշտ և անընդունելի ձևակերպումներով վերջին հայտարարությանը:
Մեր զրուցակցի կարծիքով՝ Վիտալի Բալասանյանի այսպիսի հայտարարությունը հետևանք է ոչ միայն այն բանի, որ նա նախորդ հայտարարությունների համար չի պատժվել, այլև այն բանի, որ հեղափոխությունը կիսատ մնաց. «Այսինքն՝ հեղափոխությունը պիտի հաղթանակեր Հայաստանի Հանրապետության ամբողջ տարածքում՝ ներառյալ Արցախի մարզը. եթե մենք Սերժին մերժում ենք այստեղ, ապա ինչպե՞ս ենք սերժականներին թողնում այնտեղ»:
Ինչպես նշեց Արա Պապյանը՝ այսօր այդ մարդիկ համախմբվել են և դարձել են արտաքին ուժերի ձեռքին գործիք. «Բալասանյանը չի գործում ինքնագլուխ, նա պարզապես սպասարկում է այլ երկրների շահերը»:
Քաղաքագետի խոսքով՝ Արցախի իշխանությունները առայժմ չեն դատապարտել Բալասանյանի այդ հայտարարությունը: «Առավելագույնը եղել է այն, որ նրանք հայտարարել են, թե դա իր անձնական կարծիքն է և չի արտահայտում իշխանության տեսակետը: Բայց ես նորից եմ կրկնում՝ սա կարծիք չէ, սա սպառնալիք է. փորձ է արվում, իրենց իսկ բառերով ասած, սեպ խրել Հայաստանի և Հայաստանի մաս հանդիսացող Արցախի միջև, անվստահություն, անապահովության զգացողություն սերմանել արցախաբնակների մեջ՝ օտարերկրյա խաղաղարար ուժեր Արցախ մտցնելու համար՝ ասելով, թե հայաստանցիներն այլևս մեզ չեն օգնում»,- կարծում է Արա Պապյանը:
Հարցազրույցն ամբողջությամբ՝ տեսանյութում:
