Տեղական ինքնակառավարման մարմինների սեպտեմբերի 29-ի ընտրություններում 13 համայնքից 5-ում վերընտրվել են գործող համայնքապետները, որոնք Հանրապետական կուսակցության անդամ են եղել, իսկ հեղափոխությունից հետո լքել ՀՀԿ-ն:
Իշխող «Քաղաքացիական պայմանագիր» կուսակցությունը ոչ մի համայնքում թեկնածու չի առաջադրել: Համայնքապետների ընտրությամբ տարածքային կառույցներից որևէ ՔՊ-ական հետաքրքրված չի եղել:
Իշխող «Իմ քայլը» խմբակցության ներկայացուցիչներն այս հանգամանքը մեկնաբանում են հետևյալ կերպ. «Կարևորն արդար ու թափանցիկ ընտրություններ են տեղի ունեցել»։
Քաղաքագետ Գագիկ Համբարյանի կարծիքով՝ «Քաղաքացիական պայմանագիրն» ունի կադրային շատ սուղ բազա, և հենց դրանով կարելի է բացատրել այն փաստը, թե ինչու իշխող ուժը թեկնածու չի առաջադրել։ «ՔՊ-ն նույնիսկ իշխանության վերնախավում չի կարողանում նորմալ մարդկանց առաջադրել, ուր մնաց՝ ՏԻՄ-երում կարողանա»,- «Առաջին լրատվական»-ի հետ զրույցում ասաց նա։
Ինչ վերաբերում է նախկին ՀՀԿ-ական համայնքապետների վերընտրվելու հանգամանքին, մեր զրուցակիցն ասաց. «Նորմալ է, հարմարվող անձինք են և հարմարվում են բոլոր տեսակի իշխանություններին։ Իրենք պատրաստ են ծառայել և՛ ՀՀԿ-ին, և՛ «Քաղաքացիական պայմանագրին», և՛ բոլորին։ Սա շատ լավ հասկանում են իշխանությունները, և դրանով է պայմանավորված այն փաստը, որ նրանք հաղթանակ տարան ՏԻՄ ընտրություններում։ Տարօրինակ չի լինի նաև այն փաստը, որ վաղը այդ նույն նախկին ՀՀԿ-ականները համագործակցեն այս իշխանությունների հետ։ Սրանով է պայմանավորված իշխանությունների «անտարբեր» վերաբերմունքը կիրակի օրը տեղի ունեցած ՏԻՄ ընտրությունների հետ կապված»։
Մեր այն հարցին՝ արդյոք հասարակությունը չի ուզո՞ւմ փոփոխություններ, եթե անընդհատ նույն մարդկանց է ընտրում, թե՞ պարզապես այլընտրանք չի տեսնում, Համբարյանը պատասխանեց. «Ամենակարևորը հենց այն է, որ հասարակությունը շատ դեպքերում ուզում է փոփոխություններ, բայց այլընտրանք չկա։ Կամ եթե այդ այլընտրանքը կա՝ այնքան ցածր է իր մակարդակով գործող համայնքապետից, որ մեխանիկորեն ընտրողները գերադասում են մնա հինը, քան գործ ունենան այլընտրանք կոչվածի հետ, որն անհայտ է, թե իրենց ուր կտանի»։
Լոռու նախկին մարզպետ Վիգեն Խաչատրյանն «Առաջին լրատվական»-ի հետ զրույցում ասաց. «Խորապես համոզված եմ, որ ՏԻՄ-երի գործունեությունը ճիշտ չէ կուսակցականացնել։ Դրանք համայնքների յուրովի խնդիրներ են, տվյալ համայնքի բնակչությանը հուզող խնդիրները պետք չէ քաղաքականացնել, կուսակցականացնել։ Համայնքային հարցերը գաղափարախոսության հետ քիչ առնչություն ունեն։
Դրանք ավելի շատ կենցաղային, տնտեսական հարցեր են, և ես կարծում եմ՝ ճիշտ է չկուսակցականացնել համայնքային իշխանություններին և երբեք համայնքի ղեկավարին չդիտել համապետական ընտրությունների կազմակերպման պլացդարմ»։
Խաչատրյանը նշեց՝ մարդիկ կարող են համայնքապետի հարցում միակարծիք լինել, բայց համապետական հարցերում այլ կարծիք ունենալ՝ ելնելով գաղափարական համոզմունքներից ու աշխարհայացքից. «Կարծում եմ՝ իմաստուն բան է՝ չխառնվել ու չկուսակցականացնել համայնքները»։
Ըստ մեր զրուցակցի՝ այլ խնդիր է մեծ քաղաքները։ «Այնտեղ, այդուհանդերձ, ընտրությունների ծավալն ու որակը այլ է։ Միջին և փոքր համայնքներում ճիշտ չեմ համարում կուսակցականացնելը, առկա խնդիրների լուծումից բխող պահանջ չէ։ Առկա խնդիրների լուծումը պահանջում է համախմբվածություն և գաղափարական տարաձայնությունների բացառում»,- եզրափակեց նա։
