ԱՄՆ հատուկ ծառայությունների նախկին աշխատակից Էդվարդ Սնոուդենն ապրիլի 5-ին տեսակոնֆերանսի ռեժիմով մասնակցել է Amnesty International հեղինակավոր իրավապաշտպան կազմակերպության ակտիվիստների ամենամյա համագումարին՝ հայտնում է ITAR-TASS-ը: Չիկագոյի (Իլինոյս նահանգ) հյուրանոցներից մեկում տեղի ունեցած հանդիպումը նվիրված է քաղաքացիների անձնական կյանքին ԱՄՆ հետախուզության միջամտությանը:
Սնոուդենը հայտարարել է, որ ռադիոէլեկտրոնային հետախուզությամբ զբաղվող Ազգային անվտանգության գործակալության (ԱԱԳ) հավաքած, այսպես կոչված, հեռախոսային խոսակցությունների մեթատվյալները նույնիսկ ավելի կոպիտ միջամտություն են անձնական կյանքին, քան հեռախոսազրույցների ուղղակի գաղտնալսումը կամ էլեկտրոնային փոստի ստուգումը:
Հեռախոսազանգերի մասին մեթատվյալներ հավաքելով՝ ԱՄՆ իշխանությունները, որքանով հայտնի է, գրանցում են զրուցակիցների հեռախոսահամարներն ու խոսակցության տևողությունը: Խոսակցության բովանդակությունը, իբր, չի ձայնագրվում:
«Մեթատվյալները հնարավորություն են տալիս ստույգ տեղեկություն ստանալ մեզանից յուրաքանչյուրի անձնական կյանքի մասին: Դրանք պատմում են՝ ում հետ ենք մենք շփվում, մեր քաղաքական նախընտրությունների մասին»,- ասել է Սնոուդենը:
Amnesty International-ի համագումարին մասնակցել է նաև բրիտանական Guardian թերթի նախկին լրագրող Գլեն Գրինվալդը, ով առաջինն էր հրապարակել Սնոուդենի գաղտնի փաստաթղթերը: Նա համագումարին մասնակցել է տեսակոնֆերանսի միջոցով՝ Բրազիլիայից:
Սնոուդենը 2013թ. հունիսին ժամանակավոր ապաստան է գտել Ռուսաստանում:
