Նախօրեին կրկին կիլոմետրերով հերթեր են գոյացել Վերին Լարսում: Ըստ նախնական դիտարկման՝ խնդիրը բացառապես ռուսական կողմում է։ Վրացական սահմանակետում խնդիր կարծես թե չունենք։ Բեռնափոխադրող ընկերությունների սեփականատերերը պնդում են, որ ռուսաստանցի սահմանապահները, մաքսավորները կամայականորեն միայն հայկական բեռների և հայաստանցի վարորդների դեմ են ընդգծված խտրական վերաբերմունք հանդես բերում։
«Էքսպորտ Արմենիա» փորձագետների ասոցիացիայի համահիմնադիր Էմիլ Ստեփանյանն «Առաջին լրատվական»-ի հետ թեմայի շուրջ զրույցում նշեց, որ խնդիրն իրենց ուսումնասիրության ներքո է և խնդրի հետ կապված՝ տեղեկատվություն են ստանում. «Այսօրվա դրությամբ նման պնդում չենք կարող անել. խնդրին առնչվել են Ռուսաստանի տարածքից դուրս եկող բոլոր երկրների բեռնափոխադրողները՝ թե՛ հայերը, թե՛ ռուսները, թե՛ վրացիները, և թե՛ այլ ազգերի ներկայացուցիչները: Միգուցե հայերի տեսակարար կշիռն է այնտեղ մեծ, և ոչ թե խտրական վերաբերմունք է ցուցաբերվում»:
«Ընդհանուր առմամբ՝ Վերին Լարսում տիրող իրավիճակը կարող ենք համարել ստաբիլ վատ՝ տարին 4-5 անգամ աղետի վերածվող»,- ընդգծեց Էմիլ Ստեփանյանը՝ մանրամասնելով, որ այս անգամ խնդիրն առաջացել էր՝ կապված կշեռքի գործածման հետ: «Մինչ այժմ կշեռքն անսարք էր բեռնատարի հարվածելու հետևանքով, հիմա այն սարքի է բերվել, և, ռուսների պնդմամբ՝ կշեռքի օգտագործման ընթացակարգով 5 անգամ ավելանում է պրոցեդուրալ տևողությունը»,- նշեց փորձագետը:
«Էքսպորտ Արմենիա» փորձագետների ասոցիացիայի համահիմնադիր Աննա Բեկլարովայի խոսքով, որպեսզի այդպիսի հերթեր չգոյանան, կարելի է, որպես ԵԱՏՄ անդամ երկիր, Հայաստանին տրամադրել Վլադիկավկազի անցակետը:
«Խնդիրների մեծ մասն առաջանում է հերթ գոյանալու պատճառով: Հերթը ծնում է կոռուպցիա և շատ այլ վատ դրսևորումներ… »,- ընդգծեց Էմիլ Ստեփանյանը՝ հավելելով, որ Վլադիկավկազի անցակետ տեղափոխվելը խնդրի միջանկյալ լուծում կլինի, բայց ոչ վերջնական:
Մանրամասն՝ տեսանյութում:
