Ամենայն հայոց կաթողիկոս Գարեգին Երկրորդն անդրադառնալով վարչապետ Փաշինյանի լոսանջելեսյան հայտարարությանը՝ որոշ հոգևորականների ծնկի բերելու մասին, լրագրողներին ասել է, որ ակնկալում է վարչապետի վերադարձից հետո հանդիպման ընթացքում խոսել այդ թեմայով և հասկանալ իրավիճակը:
Վարչապետի հայտարարությունը դարձավ մեծ աղմուկի պատճառ, հատկապես նախկին իշխանության շրջանակների համար, որոնք բաց չթողեցին նրան Հայ առաքելական եկեղեցու դեմ գրոհի համար մեղադրելու առիթը, թեև Փաշինյանը շատ հստակ ընդգծել էր, որ խոսքը որոշ հոգևորականների մասին է, իսկ եկեղեցուն պետությունը պատրաստ է աջակցել այն շրջանակում, որը նպատակահարմար կդիտարկի, և որի կարիքը կզգա եկեղեցու ղեկավարությունը՝ ՀԱԵ-ն ավելի հզորացնելու համար:
Այդուհանդերձ, անկախ այդ շահարկումներից, որոնք արդեն դարձել են բոլորի համար սպասելի և սովորական մարտավարություն, հանրությանն իրապես հետաքրքիր է, թե ինչո՞ւ վարչապետը կոշտ անդրադարձ կատարեց իրեն ուղղված հարցին, ո՞րն էր այդ կոշտության առիթը: Որովհետև կարծես թե զուտ տեսական ռիսկի մասին խոսելու պարագայում Նիկոլ Փաշինյանը հազիվ թե կոնկրետ թիրախում դիտարկեր որոշ հոգևորականների: Դա հիմք է տալիս եզրակացնելու, որ վարչապետն այդուհանդերձ տիրապետել է որոշակի տեղեկատվության որոշ հոգևորականների գործունեության առնչությամբ, ինչի կապակցությամբ էլ հայտնել է դժգոհությունը, և ինչով պայմանավորված է եղել կոշտ արձագանքը:
Այդ իմաստով հետաքրքիր է մի հանգամանք: Լոս Անջելես մեկնելուց առաջ Նիկոլ Փաշինյանը մասնակցեց ռուսաստանցի միլիարդատեր Սամվել Կարապետյանի աջակցությամբ նորոգված Վեհարանի բացման արարողությանը: Եթե կային «որոշ հոգևորականների» վարքագծի հետ կապված խնդիրներ կամ դիտարկումներ, ապա ենթադրվում է, որ վարչապետն այդ կապակցությամբ կհայտներ ինչ-որ բան Կաթողիկոսին: Գարեգին Երկրորդի այսօր տված արձագանքը հուշում է, որ Կաթողիկոսին որևէ բան հայտնի չէ, թեև հնարավոր է, որ Գարեգին Երկրորդը պարզապես ոչինչ չի ցանկանում խոսել, քանի դեռ իրավիճակը չի քննարկել վարչապետի հետ, ինչը չի բացառում, որ նա այդուհանդերձ տեղյակ է, թե ինչն էր Փաշինյանի կոշտության պատճառը:
Պետք չէ բացառել նաև, որ այդ կոշտության շարժառիթներից մեկն էլ եղել է այն, որ վարչապետը խնդրի առնչությամբ չի ստացել Կաթողիկոսի բավարար կամ համարժեք արձագանքը, ինչից հետո որոշել է սրել հարցը: Այդ ամենն անշուշտ ենթադրության, վարկածային դիտարկումների դաշտից է, իսկ խնդիրը թերևս ունի առավել հստակեցման կարիք, և վարչապետի վերադարձից հետո վարչապետ-Կաթողիկոս ձևաչափով դրա քննարկումը կտա հանրային հարցերի պատասխանները:
