«Հայֆեստ» միջազգային թատերական փառատոնն այս տարի Երևանում կկայանա հոկտեմբերի 1-8-ը: 17-րդ փառատոնը ներկայացված է «Իմաստը ներկայում է» խորագրի ներքո: «Արվեստը պետք է ստեղծի իմաստներ… Երբ որ հայտնի ռեժիսոր Փիթեր Բրուքին հարցնում են՝ դուք ասում եք՝ իմաստ, իմաստ, որտե՞ղ փնտրել այն, նա պատասխանում է՝ իմաստը ներկայում է»,- «Առաջին լրատվական»-ի հետ զրույցում այս մասին ասաց «Հայֆեստ» փառատոնի հիմնադիր Արթուր Ղուկասյանը: Նրա խոսքով՝ թատրոնի, կատարողական արվեստների բացառիկությունն այն է, որ հենց հանդիսատեսի աչքի առաջ է ստեղծվում. այսինքն՝ իմաստը ներկայում է:
«Չմոռանալով դասականը՝ զարգացնել ժամանակակիցը. սա շատ կարևոր է»,- ընդգծեց մեր զրուցակիցը: Նրա դիտարկմամբ՝ գլոբալ առումով մշակութային քաղաքականության մեջ Հայաստանի Հանրապետությունը դեռ անցումային փուլում է. «Անցումային փուլը կարող է արագ տեղի ունենալ, եթե ինչ-որ կայացած կառույցի մեջ են ներգրավվում»:
«Մարդուն մարդ են դարձնում կրթությունն ու մշակույթը»,- ընդգծեց Արթուր Ղուկասյանը՝ հավելելով, որ մշակույթի և կրթության նախարարությունների միավորման դեպքում տուժում է մշակույթը, քանի որ կրթությունն առաջնային է համարվում. «Այն երկրներում, որտեղ մշակույթն ու կրթությունը միացնում են, տանուլ են տալիս»: