Ֆրանսիայում Լիլից ոչ հեռու գտնվող Արմանտիեր քաղաքում տեղի բնակիչները նկատել են սև ընձառյուծի, որը քայլում էր տներից մեկի տանիքին: Այս մասին հաղորդում է «Եվրոպեյսկայա պրավդան»՝ հղում անելով տեղական La Voix du Nord պարբերականին: Չորեքշաբթի օրը քաղաքի բնակիչները մոտ մեկ ժամ հետևել են, թե ինչպես է ընձառյուծը քայլում բնակելի շենքի երկրորդ հարկի քիվի վրայով:
Ոստիկանությունը շրջափակել է տարածքը՝ մտավախություն ունենալով, որ կենդանին կարող է ներքև ցատկել:
Անասնաբույժները 5-6 ամսական մոտ 20 կգ քաշով կենդանուն վնասազերծել են քնաբերով տեգի օգնությամբ:
Ընձառյուծին տեղավորել են վանդակի մեջ և հանձնել վայրի բնության հարցերով դեպարտամենտի աշխատակիցներին, որոնք իրենց հերթին կենդանուն փոխանցել են Կենդանիների պաշտպանության լիգային, որտեղ և նա գիշերել է:
Կազմակերպության ներկայացուցիչները պատմել են, որ ընձառյուծը տնային էր և ոչ ագրեսիվ: Նրա ճանկերը կտրված էին, բայց, ընդհանուր առմամբ, նա իրեն լավ էր զգում: Ընձառյուծին, հավանաբար, կհանձնեն Մոբյոժ քաղաքի կենդանաբանական այգուն:
