ԱՄՆ պետքարտուղար Հիլարի Քլինթոնը հայտարարել է, որ Սիրիայի նախագահ Բաշար Ալ-Ասադն այլևս կորցրել է իր լեգիտիմությունը, ԱՄՆ-ն էլ նրան չի դիտարկում որպես այդ երկրի առաջնորդ: Այս մասին հաղորդում է Reuters գործակալությունը: Այս խոսքերը հետևել են երեկ Դամասկոսում ԱՄՆ-ի և Ֆրանսիայի դեսպանատների վրա հարձակումներին, որոնք իրականացրել էին Սիրիայի ռեժիմի աջակիցները: Բողոքարարները կոտրել են դեսպանատների պատուհանները, իսկ ԱՄՆ դեսպանատան շենքի վրա ամրացրել են Սիրիայի ազգային դրոշը:
«Եթե ինչ-որ մեկը, այդ թվում՝ նախագահ Ասադը, կարծում է, որ ԱՄՆ-ում համարում են, թե Սիրիայի ռեժիմը կարող է մնալ, որպեսզի շարունակի իր բռնաճնշումները, նա չարաչար սխալվում է»,- ասել է Քլինթոնը: Ամերիկյան և ֆրանսիական կողմերն ասել են, որ հարձակմամբ Սիրիայում խախտվել է Վիեննայի կոնվենցիան, որը նախատեսում է դիվանագիտական գործունեության պաշտպանվածություն և ազատություն:
Հարձակումից հետո հայտարարությամբ հանդես է եկել նաև ԱՄՆ նախագահ Բարաք Օբաման, որն ասել է, թե փոխհատուցում է պահանջելու նախագահ Ալ-Ասադի կողմից ԱՄՆ դեսպանատան վրա հարձակման համար: Այս մասին հաղորդում է Associated Press գործակալությունը: Նա Սիրիայի կառավարությանը մեղադրել է դիվանագիտական ներկայացուցչությունը պատշաճ կերպով չպաշտպանելու մեջ: