«Սահմանադրական դատարանը, իմ կարծիքով, քցեց Քոչարյանին: Ապշեցուցիչ է, որ հիմա կարծիք են հայտնում, թե հեսա Քոչարյանը դուրս կգա: Սահմանադրական դատարանն ինչ կապ ունի Քոչարյանի ազատման հետ. գործը պետք է անցնի դատական բոլոր ատյաններով»,- «Առաջին լրատվական»-ի հետ զրույցում ասաց նախկին քաղբանտարկյալ Ժորա Սափեյանը:
Նրա խոսքով՝ Ռոբերտ Քոչարյանը ոչ թե Արցախի հերոս է, այլ եղել է շարքային խոպանչի. «Հետո երկուսով (Սերժ Սարգսյանի հետ) դարձան փոդրաթչի և 20 տարվա մեջ էս ազգին ու ժողովրդին կեղեքեցին: Նրանք եկել են մի բանի համար՝ հարստանալու համար»:
Նախկին քաղբանտարկյալ Վարդան Մալխասյանն էլ հռետորական հարց բարձրացրեց. «Իսկ ովքեր են դատավորները: ՍԴ ինքնահռչակ նախագահ Հրայր Թովմասյանը, վեցնոցի նման, ստորաքարշորեն 20 տարի շարունակ ծառայելով նախկին բանդիտական քրեաօլիգարխիկ ռեժիմին, Սերժ Սարգսյանի հետ միասին կազմել էին մի հատուկ պլան, որ իրենց իշխանությունը առնվազն մինչև 40-50 թիվը պետք է մնա ղեկին: Եվ դրա համար ստեղծեցին իրենց իշխանությունը հավերժացնող Սահմանադրություն, այսինքն՝ աստվածներին հավասար մարդիկ են սրանք՝ ցմահ պաշտոնավարող»:
Վարդան Մալխասյանը ՍԴ որոշումը համարում է խեղկատակություն և խայտառակություն. «Այս հայցը ընդհանրապես ՍԴ մուտք անելու իրավունք չկար, բայց ՍԴ-ի այս խրտվիլակը թույլ է տվել մուտք անել: Եզրահանգումն էլ էնքան անհասկանալի է, որ իրավաբանները ընկել են խառնաշփոթի մեջ, ոչ ոք գլուխ չի հանում, թե էս խրտվիլակն ինչ է ուզեցել ասել»:
