«Ռոբերտ Քոչարյանի գործով Սահմանադրական դատարանում իրավական որևէ գործընթաց տեղի չի ունենում։ Հարցը իրավական հարթության մեջ չէ։ ՍԴ որոշումը Քոչարյանի գործով լինելու է քաղաքական որոշում՝ կախված նրանից, թե այս օրերին ինչեր կարող են տեղի ունենալ»,- «Առաջին լրատվական»-ի «Մամուլի հետ սուրճ» հաղորդման շրջանակներում ասաց լրագրող, վերլուծաբան Մհեր Ղալեչյանը։
Նրա խոսքով՝ ՍԴ-ն երեկ Քոչարյանի գործով այսօր սպասվելիք նիստը հետաձգեց, քանի որ Հրայր Թովմասյանը դեռ չի որոշել՝ ինչպես վարվի, դեռևս հաշվարկներ է կատարում։
Մհեր Ղալեչյանի խոսքով՝ ներկայումս ճգնաժամ է ոչ միայն ՍԴ-ում, այլև ամբողջ կառավարման համակարգում, և այդ ճգնաժամը վաղ թե ուշ կարող է լուրջ հետևանքներ ունենալ, եթե իշխանությունը կոնկրետ քայլեր չձեռնարկի։ «Այս ճգնաժամը իշխանությունների համար կարող է լուրջ խնդիրներ առաջացնել։ Մենք գործ ունենք մի պետական մարմնի հետ, որի ղեկավարը, Փաշինյանի բնորոշմամբ, ՍԴ-ն վերաբերում է բուդկայի պես, և նրանից ամեն ինչ կարելի է սպասել։ Այնպես որ՝ սա շատ լուրջ խնդիր է և կարող է պառակտումների պատճառ դառնալ։ Պատմությունը ցույց է տալիս, որ իշխանության թևերի միջև բախումները լուրջ հետևանքներ են առաջացնում՝ ընդհուպ քաղաքացիական պատերազմ։ Չպետք է հարցի լուծմանը մատների արանքով նայել»,- ասաց Ղալեչյանը։
Զրույցի ընթացքում անդրադարձ եղավ նաև Քոչարյանի փաստաբան Հայկ Ալումյանի ասածներին, թե առաջին անգամ բանակը ժողովրդի դեմ հանել է Լևոն Տեր-Պետրոսյանը 1996 թվականին։ Ղալեչյանի խոսքով՝ եթե նման բան անգամ եղել է, ապա 10 տարի Քոչարյանը, 10 տարի էլ Սերժ Սարգսյանը ժամանակ ունեին Տեր-Պետրոսյանին դատելու այդ արարքի համար։ Ինչի մասին է խոսքը. «Գիտեք, ինձ թվում է՝ հիմա չկա ավելի խադավոյ գործ, քան Քոչարյանի փաստաբանությամբ զբաղվելը։ Կարծում եմ՝ Ամուլսարից էլ շահութաբեր է։ Ալումյանը կարող էր զուգահեռ անցկացնել նաև Ավարայրի ճակատամարտի հետ։ Բնական է, փաստաբանները բոլոր հնարավոր և անհնար մեթոդներով պետք է իրենց պաշտպանյալին պաշտպանեն։ Ես կարծում եմ, որ Ալումյանի ասածները Քոչարյանի փաստաբաններից մյուսի ասածների համեմատ՝ Արցախի ազատագրված տարածքների մասին, չնչին բան է»,- ասաց Ղալեչյանը։
Զրույցի ընթացքում անդրադարձ է եղել նաև Ամուլսարի խնդրին։
Առավել մանրամասն՝ տեսանյութում: