«Մերձավորարևելյան քառյակի» արտաքին գործերի նախարարները երկուշաբթի օրը՝ հուլիսի 11-ին, կհանդիպեն Վաշինգթոնում, որպեսզի հրապարակեն հայտարարություն, որը հիմնված է ԱՄՆ նախագահ Բարաք Օբամայի մայիսյան հայտարարության վրա, որով նա Իսրայելին և Պաղեստինի ինքնավարությանը կոչ էր արել վերադառնալ բանակցությունների և 1967 թ. սահմանների հիման վրա ստեղծել պաղեստինյան պետություն:
Երուսաղեմի աղբյուրների հայտնած տեղեկության համաձայն՝ «Քառյակը» կողմերին չի առաջարկելու բարձր մակարդակով հանդիպում, դրա փոխարեն, կուղարկի իր սեփական խումբը, որը պետք է որոշի, թե արդյոք ժամանա՞կն է բանակցությունները վերսկսելու համար: Կիրակի օրը՝ հուլիսի 10-ին, իսրայելական կառավարության բարձրաստիճան 8 պաշտոնյաներ քննարկել են «Քառյակի» արվելիք հայտարարությունը:
Երուսաղեմի աղբյուրը նշել է, որ երկրի վարչապետ Բենյամին Նեթանյահուն և նրա կոլեգաները անհանգստանում են, որ «Քառյակի» հայտարարությունը կարող է անակնկալ լինել Իսրայելի համար՝ կրկնելով Բարաք Օբամայի հայտարարությունը: Անհանգստության առիթն այն է, որ հրապարակումից 24 ժամ առաջ «Քառյակի» կողմից վերանայվում է հայտարարության տեքստը:
Հիշեցնենք, որ ավելի վաղ պաղեստինյան ինքնավարության աշխատակազմի ներկայացուցիչները հույս էին հայտնել, որ «Մերձավորարևելյան քառյակի» անդամները՝ ԱՄՆ-ը, Ռուսաստանը, ԵՄ-ն ու ՄԱԿ-ը, կստիպեն Իսրայելին ընդունել Պաղեստինի անկախությունը, և որ նորաստեղծ պաղեստինյան պետությունը կդառնա ՄԱԿ-ի 194-րդ անդամը:
