Այսօր ՀՀ ԳԱԱ-ում մեկնարկել Է «Դինամիկ համակարգերը, ոչ գծային անալիզը և նրանց կիրառությունը» միջազգային գիտաժողովը, որին մասնակցում են 8 երկրների` ԱՄՆ-ի, Կանադայի, Ռուսաստանի, Ֆրանսիայի, Չեռնոգորիայի, Բելառուսի, Իրանի և Հայաստանի գիտնականներ: Գիտաժողովի օրակարգում դինամիկ համակարգերի ժամանակակից տեսության ակտուալ խնդիրներն են:
«Ամեն տարի աշխարհում մաթեմատիկայի որևէ ուղղվածության միջազգային գիտաժողով է հրավիրվում: Այս մեկը մեզ համար կարևորվում է իր բովանդակությամբ, զեկույցների թեմատիկայով»,- ասաց ԳԱԱ նախագահ Ռադիկ Մարտիրոսյանը և հավելեց, որ նման գիտաժողով Հայաստանում առաջին անգամ է անցկացվում: Նա հույս հայտնեց, որ գիտաժողովը ավանդական կդառնա:
Ռ. Մարտիրոսյանը կարևորեց, որ 2 օր Երևանում աշխատելուց հետո գիտնականները կմեկնեն Ստեփանակերտ, որտեղ հուլիսի 14-15-ը Արցախի պետական համալսարանում կշարունակեն գիտաժողովը:
«Սա հայրենասիրական, չեմ ուզում ասել՝ քաղաքական, նշանակություն ունի մեզ համար, քանի որ Արցախի հասարակությունը բարձր է գնահատում գիտությունը: Այս ոլորտում շատ մասնագետներ կան Լեռնային Ղարաբաղից»,- նշեց Ռ. Մարտիրոսյանը` միաժամանակ հյուրերին «նախազգուշացնելով», որ Արցախ մեկնողները հայտնվում են Ադրբեջանի սև ցուցակում:
«Առաջին լրատվական»-ի հարցին, թե ինչպես որոշվեց գիտաժողովը շարունակել Արցախում, և հյուրերն ինչպես են դրան վերաբերվում, ԳԱԱ նախագահը պատասխանեց, որ գլխավոր կազմակերպիչը` ՌԴ ԳԱԱ ակադեմիկոս Լևոն Բեգլարյանը, ծնունդով ղարաբաղցի է. «Գիտաժողովը Ղարաբաղում անցկացնելն ունի կարևոր նշանակություն, որովհետև այսօր այնտեղ գործում է համալսարան, կադրեր են պատրաստվում, և դա ունի լուսավորչական նշանակություն»:
Լ. Բեգլարյանը մեզ հայտնեց, որ գիտաժողովի նպատակը նաև հյուրերի շփումն է, նոր կապերի ստեղծումը և հների ամրապնդումը. «Ղարաբաղում շատ կարևոր է գիտական կապերի ստեղծումը: Այնտեղ պահպանվել է դպրոցը. բուհում և դպրոցներում ծրագրերը պահպանվել և ուսուցանվում են: Խնդիրն այն է, որ պետք է ամեն ինչ վերակառուցել, բայց ամեն տեղ է պետք վերակառուցել»:
Գիտաժողովի կազմակերպիչներն են ՀՀ ԳԱԱ մաթեմատիկայի ինստիտուտը, ինֆորմատիկայի և ավտոմատացման պրոբլեմների ինստիտուտը, ՌԴ Գիտությունների ակադեմիայի կենտրոնական տնտեսամաթեմատիկական ինստիտուտը, Երևանի պետական համալսարանը, Արցախի պետական համալսարանը:
