Грузия Online-ի փոխանցմամբ՝ Վրաստանի ՆԳՆ տեղեկատվա-վերլուծական դեպարտամենտի ղեկավար Շոթա Ուտիաշվիլին ռուսական Коммерсант պարբերականին տված հարցազրույցի ժամանակ հայտարարել է, որ խորհրդային ժամանակ Վրաստանում կար Պետական անվտանգության կոմիտեի (ՊԱԿ) 22.000 գործակալ, իսկ Գլխավոր հետախուզական վարչության (ԳՀՎ) գործակալների քանակն ավելի մեծ է եղել։
Երբ հարցրել են, թե արդյոք դա շատ չէ՞, Ուտիաշվիլին զարմացել է այդ հարցադրումից՝ ասելով. «Դուք չգիտեք, թե ՊԱԿ-ն իրենից ինչ է ներկայացրել։ Նույնը կարելի է ասել Խորհրդային միության մասին։ Միայն Արևելյան Գերմանիայում կար 1 միլիոն գործակալ։ Բացի այդ, չպետք է մոռանալ, որ Վրաստանն այն ժամանակ հագեցած էր գործակալներով, քանի որ այստեղով էր անցնում Խորհրդային միության ու ՆԱՏՕ-ի սահմանը։
Թեև ՊԱԿ-ի արխիվները Վրաստանից տարվել են Սմոլենսկ, այնուամենայնիվ, ինչ-ինչ բաներ պահպանվել են, որտեղից էլ մենք իմացել ենք Վրաստանում ՊԱԿ-ի գործակալների քանակի մասին։ Նրանք հեղինակազրկող նյութեր ունեն Վրաստանի քաղաքացիների նկատմամբ, որոնք հանուն դրանց չբացահայտվելու՝ պատրաստ են ամեն ինչի։ Այժմ մենք գիտենք, որ նրանք վերականգնում են իրենց հին կապերը»։
