«Առաջին լրատվական»-ի «Մամուլի հետ սուրճ» հաղորդման այսօրվա հյուրն է ԱԺ «Իմ քայլը» խմբակցության պատգամավոր Հովհաննես Հովհաննիսյանը:
Մեր զրուցակիցը նշեց, որ երբևէ չի խուսափել իր դիրքորոշումը հայտնելուց կամ երբևէ չի լռել, եթե կա կարևոր հարց՝ թեկուզ դա լինի ցավոտ կամ ընդունվի հարվածներով: Եվ այս համատեքստում արտահայտելով իր դիրքորոշումը՝ կապված Ամուլսարի հանքի շահագործման հետ, ասաց. «Բնականաբար, «Իմ քայլը» խմբակցության բոլոր պատգամավորները և, կարծում եմ, Հայաստանի բոլոր ռացիոնալ մարդիկ չեն ուզում հանքի շահագործում, և եթե լիներ իշխանության որոշելիք խնդիրը, շատ իդեալական պայման կլիներ, եթե Հայաստանում չլիներ որևէ հանք: Եվ նույն ինքը՝ վարչապետը, շատ երջանիկ կլիներ և շատ կոմֆորտ զոնայի մեջ կլիներ, եթե չլիներ այս ժառանգած խնդիրը. այսօր մենք բախվում ենք իրավիճակների, որոնք ժառանգել ենք նախորդ իշխանություններից»:
Նրա խոսքով՝ եթե չլինեին կայացված որոշումները, և գործընթացը այսքան հեռու գնացած չլիներ, բնականաբար հանքը չէր շահագործվի. «Եվ բոլոր պատգամավորների մոտ երկճեղքում կա. մի կողմից՝ դու ունես քաղաքացիական ակտիվության անցած ճանապարհ, մյուս կողմից՝ դու մտել ես քաղաքականության մեջ և ստանձնել ես պատասխանատվություն և պարտավորություն երկրի, պետության առջև»:
Հովհաննես Հովհաննիսյանն ընդգծեց, որ ինքը չէր կարող ունենալ ջայլամային դիրքորոշում, և ասաց. «Ե՛վ հանքի շահագործումը, և՛ չշահագործումը ունեն ռիսկեր: Ինձ ոչ այնքան վախեցնում են «Լիդիանի» կողմից արբիտրաժային դատարան դիմելը և շրջանառվող մեծ գումարները, որքան այն, թե ինչպիսին կլինի Հայաստանը օտար ներդրողների աչքերում: Իմ հիմնական մտահոգությունը Հայաստանի միջազգային հեղինակությունն է, Հայաստանի ներդրումային ֆոնը»:
Առավել մանրամասն՝ տեսանյութում: