Թուրքիան պաշտոնապես չի բացառվել ամերիկյան 5-րդ սերնդի F-35 կործանիչ-ռմբակոծիչների ծրագրից: Այս մասին հայտարարել է Թուրքիայի արտաքին գործերի նախարար Մևլյութ Չավուշօղլուն, հաղորդում է ՏԱՍՍ-ը:
«Թուրքիան պաշտոնապես չի բացառվել F-35-ի ծրագրից: Կարծում եմ՝ մենք կկարողանանք շարունակել այդ աշխատանքը՝ փոխադարձ համաձայնությունների հիմքով: Հակառակ դեպքում երկու կողմերը քայլեր կձեռնարկեն, ինչը վնաս կհասցնի հարաբերություններին»,- Haberler-ը մեջբերում է Չավուշօղլուի խոսքերը:
Նա նաև հայտնել է, որ այժմ Անկարան կցանկանար «ոչ թե խոսել այդ մասին, այլ զբաղվել հրատապ հարցերի լուծմամբ»:
2017-ի սեպտեմբերին Ռուսաստանը C-400 զենիթահրթիռային համակարգեր մատակարարելու շուրջ Թուրքիայի հետ 2.5 մլրդ դոլար արժողությամբ գործարք է կնքել: Ռուսական համակարգերի գնման դեմ հանդես են եկել ԱՄՆ-ը և ՆԱՏՕ-ի անդամ մյուս երկրները: Սպիտակ տունը հայտարարել է, որ Թուրքիայի այդ որոշումն անհնար է դարձնում նրա մասնակցությունն ամերիկյան F-35-ի ծրագրին: