Ղրղզստանի նախկին նախագահ Ալմազբեկ Աթամբաևի տան մոտ, Քոյ-Տաշ գյուղում անցկացվող հատուկ օպերացիայի ընթացքում ստացած վնասվածքից հետո մահացել է հատուկջոկատայիններից մեկը, հաղորդում է «Ինտերֆաքս»-ը՝ հղում անելով Ղրղզստանի առողջապահության նախարարության խոսնակ Ժըլդըզ Այգերչինովին:
«Հատուկջոկատայիններից մեկը ծայրահեղ ծանր վիճակում տեղափոխվել է հիվանդանոց, որտեղ՝ չնայած վերակենդանացման միջոցառումներին, մահացել է»,- ասել է գործակալության զրուցակիցը:
ՏԱՍՍ գործակալությունն իր հերթին հայտնում է, որ տուժածների թիվը հասնում է 23-ի:
Ավելի վաղ Ղրղզստանի խորհրդարանը կողմ է քվեարկել Աթամբաևին անձեռնմխելիությունից և նախկին նախագահի կարգավիճակից զրկելու օգտին, ինչը հնարավորություն է տալիս նրան քրեական պատասխանատվության ենթարկել:
Աթամբաևը մեղադրվում է հողատարածքների վերափոխման, Բիշքեկի ջերմաէլեկտրակայանի արդիականացման ժամանակ կոռուպցիայի, քրեական հեղինակության անօրինական ազատ արձակման, ջերմաէլեկտրակայան ածուխի անօրինական մատակարարման, ինչպես նաև Քոյ-Տաշում բնակելի տուն կառուցելու համար անօրինական ճանապարհով հողատարածք ստանալու մեջ:
Նախկին նախագահի փաստաբանի խոսքերով, որոշումը հակասահմանադրական է:
Աթամբաևը ղեկավարել է Ղրղզստանը 2011-2017թթ. և դարձել է երկրի առաջին ղեկավարը, որն ինքնակամ հեռացել է պաշտոնից առաջին ժամկետի ավարտից հետո: Հենց նա է նախաձեռնել այդ պաշտոնին գործող նախագահի թեկնածուի առաջադրումը: Անցած տարվա գարնանը Աթամբաևը հրապարակայնորեն խոստովանել է Ժեենբեկովի հետ լուրջ տարաձայնությունների առկայությունը: