Ամերիկայի գավաթի խաղարկությունում կայացան C խմբի երկրորդ տուրի հանդիպումները: Խմբի բացահայտ ֆավորիտ Բրազիլիայի հավաքականը կրկին չկարողացավ հաղթանակ տոնել: Եթե Վենեսուելայի հետ խաղում բրազիլացիների առավելությունն ակնհայտ էր, և մրցակիցը հազվադեպ էր դուրս գալիս սեփական կիսադաշտից, վտանգավոր պահեր ընդհանրապես չէր կարողանում ստեղծել, ապա Պարագվայի ընտրանին բոլոր հնարավորություններն ուներ աշխարհի հնգակի չեմպիոններին հաղթելու:
Առաջին խաղակեսն անցավ հավասար պայքարում: Երկու թիմերն էլ հաշիվը բացելու մի քանի հնարավորություն ունեցան, սակայն առաջինը հաջողության հասան բրազիլացիները. 39-րդ րոպեին աչքի ընկավ Դոնեցկի «Շախտյոր»-ում Հենրիկ Մխիթարյանի թիմակից Ժադսոնը, ով խաղադաշտում էր Ռոբինիոյի փոխարեն:
Երկրորդ խաղակեսը շատ ավելի վստահ սկսեցին պարագվայցիները, նրանք լուրջ պրեսինգի էին ենթարկել բրազիլացիներին և չէին թողնում ազատ գնդակ ստանալ: 55-րդ րոպեին տուգանային հրապարակի կենտրոնում միայնակ մնացած Ռոկե Սանտա Կրուզը սառնասրտորեն գնդակն ուղարկեց Սեզարի պաշտպանած դարպասը` 1:1: Չբավարարվելով ձեռք բերածով` Մարտինոյի սաները շարունակում էին գրոհել և շուտով նրանց հաջողվեց առաջ անցնել հաշվի մեջ. 67-րդ րոպեին աչքի ընկավ փոխարինման դուրս եկած Նելսոն Վալդեսը:
82-րդ րոպեին Մենեզեսը Նեյմարի փոխարեն խաղադաշտ մտցրեց Ֆրեդին, ով 90-րդ րոպեի Բրազիլիայի հավաքականին փրկեց պարտությունից. Բրազիլիա-Պարագվայ` 2:2:
Մյուս խաղում Վենեսուելան նվազագույն հաշվով պարտության մատնեց Էկվադորին և ստանձնեց խմբի առաջատարի դերը: Այս հանդիպման միակ գոլը, 62-րդ րոպեին, խփեց Գոնսալեսը:
Երկրորդ տուրից հետո B խմբում թիմերը դասավորվել են հետևյալ հերթականությամբ.
1.Վենեսուելա 4 մ.
2.Բրազիլիա 2 մ.
3.Պարագվայ 2 մ.
4.Էկվադոր 1 մ.
