Կազանի հանդիպումից հետո համանախագահները շատ են խոսում նոր կամ լրացուցիչ առաջարկների մասին, և դեռևս պարզ չէ, թե կողմերից ո՞ւմ օգտին են լինելու այդ առաջարկները:
ԱԺ «Ժառանգություն» խմբակցության պատգամավոր Լարիսա Ալավերդյանի գնահատմամբ՝ հայկական դիվանագիտությունը ոչ թե պետք է խոսի հայանպաստ քաղաքականության կամ առաջարկների մասին, այլ պետք է խոսի տարածաշրջանում հստակ կայունության տեսակետից և այդ նոր առաջարկները դիտարկի հենց այդ տեսանկյունից:
«Առաջին լրատվականի» հարցին, թե հաշվի առնելով այն հանգամանքը, որ Կազանում առաջարկներ արել է Ադրբեջանը, կարելի՞ է ասել, որ համանախագահների նշած լրացուցիչ առաջարկները լինելու են հենց ադրբեջանականները՝ Ալավերդյանը պատասխանեց. «Այն փոփոխությունները, որոնցով կարող են հանդես գալ Մինսկի խմբի եռանախագահները պետք է լինեն հաշվի առնելով Ադրբեջանի առաջարկությունները, որովհետև մյուս կողմերից որևէ բան չկա դրված սեղանի վրա»:
Ալավերդյանի խոսքերով՝ Մինսկի խմբի եռանախագահները գործ կարող են ունենալ այն գրավոր նյութի հետ, որը տրվել է նրանց, ու դրանից ելնելով, պարզ է, որ ՄԽ կողմից մշակված փաստաթղթերը գնալով ավելի ու ավելի հեռանում են իրավական հիմքերից և մոտենում են կամայական որոշումների տրամաբանությանը:
Պատգամավորը նաև ընդգծեց, որ Արցախի և Հայաստանի մոտեցումներն այս իրավիճակին տարբերվում են այն առումով, որ Արցախը երբևէ չի հրաժարվել իրավական հիմքերով հարցը լուծելու փաթեթից, իսկ Հայաստանը կողմ է քաղաքական տարբերակին. «Մարդկության պատմությունը ցույց է տվել, որ քաղաքականացված մոտեցումները լի են արյունով ու բախումներով, իսկ իրավական մոտեցումը տալիս է հստակ հիմք, որ լուծումը լինի երկարատև»:
