«Դատավոր Դավիթ Գրիգորյանն այն արդար դատարանը չէ, երբեք չի մարմնավորել այն դատարանը, որի մասին մենք շատ երկար ժամանակ երազում ենք։ Դրա համար ես չեմ միանում Դավիթ Գրիգորյանի պաշտպանության ակցիային»,- «Առաջին լրատվական»-ի տաղավարում տեղի ունեցած քննարկման ժամանակ ասաց փաստաբան Արայիկ Պապիկյանը։ Նրա խոսքով՝ Դավիթ Գրիգորյանը այն դատավորն է, որն առաջին անգամ կայացրել է հաց բերող Արթուր Սարգսյանի կալանքի որոշումը և դրանով սկիզբ դրել նրա մահվան գործընթացին։
Քննարկմանը մասնակից փաստաբան Հովիկ Արսենյանը ևս չի միացել ակցիային, և այդ ակցիայում տհաճ բան է տեսնում: «Ինձ համար շատ տհաճ է, որ փաստաբանների մի խումբ հավաքվել և ասում են, որ ստանձնում են Դավիթ Գրիգորյանի պաշտպանությունը։ Մեկը հարցրե՞լ է ձեզ՝ Դավիթ Գրիգորյանը խնդրե՞լ է ձեր պաշտպանությունը։ Լինենք օբյեկտիվ։ Ինչի՞ մասին է խոսքը։ Եվ հետո՝ այնպիսի մեղադրանք էլ չի առաջադրվել նրան, որ փաստաբանների այդպիսի խմբի աջակցության կարիք ունենա։
Շատ տհաճ տպավորություն եմ ստացել։ Բացի դրանից՝ Դավիթ Գրիգորյանին պաշտպանող փաստաբանները այլևս դուրս են եկել քաղաքական հարթություն, քաղաքական հայտարարություններ են անում։ Մի վայնասուն է բարձրացվել, որն ինձ համար տհաճ է»,- ասաց Արսենյանը և հավելեց. «Ես մտածում եմ, որ ինչ-որ մի տեղից հրահանգ է տրվել մի քանի փաստաբանի այս աղմուկի համար, բայց սա տհաճ է, և չի կարելի խաղալ փաստաբանական ինստիտուտի հեղինակության հետ։ Այս աղմուկն արհեստածին է և այլ նպատակ է հետապնդում։ Ուղղակիորեն դա երևում է»,- ասաց Արսենյանը։
Առավել մանրամասն՝ տեսանյութում:
