Ֆինանսների նախարար Դավիթ Սարգսյանի՝ ԱԺ հարթակից ԲՀԿ-ին ուղղված, ինչպես նաև Հրայր Թովմասյանի արտահայտություններն անպատասխան չմնացին: Մարտի 25-ի ԱԺ նիստում ԲՀԿ խմբակցութան պատգամավոր Ստեփան Մարգարյանը նշեց, որ արդարադատության նախարարը, ըստ էության, Սահմանադրության կամայական մեկնաբանություն արեց՝ նշելով, որ ԱԺ-ն իրավունք չունի խառնվել ՏԻՄ-ի խնդիրներին:
«Համաձայն ենք, բայց ինքը մոռացավ, որ ԱԺ-ն իրավունք ունի օրենքների նկատմամբ վերահսկողություն իրականացնել: Ֆինանսների նախարարը, ճիշտն ասած, պարզ չէ՝ ինչու էր եկել, ըստ էության՝ քննարկվող հարցից անտեղյակ էր, բայց քանի որ թույլ տվեց վիրավորել առանձին ԲՀԿ խմբակցությանը և խորհրդարանական չորս ոչիշխանական քառյակին, ես ուզում եմ անդրադառնալ նրան ևս:
Կարծես թե նորմ է դառնում, որ այս կամ այն նախարարը Ազգային ժողովի ամբիոնի մոտ հանդես է գալիս տղայական կեցվածքով, հոխորտում է ու հետո իր միջավայրում ասում՝ տեսաք՝ ինչ արեցի»,- ասաց նա: Մարգարյանը ֆինանսների նախարարին կոռեկտության կոչ արեց, խորհուրդ տվեց մնալ չափի մեջ ու «չխառնվել մեծերի գործերին»:
ԲՀԿ-ական պատգամավորը նկատեց՝ ֆինանսների նախարարը միշտ կարևոր դերակատարություն է ունեցել կառավարությունում, սակայն կառավարությունը Դավիթ Սարգսյանին տեղյակ չի պահել, որ կազինոների մասին այդ նախագիծը ներկայացրել է կառավարությունը, և նախարարն էլ, «գլուխը կախ», նախագծի օգտին քվեարկել է:
Մարգարյանը նախարարին հավաստիացրեց՝ իրենք չեն թաքնվում պարտադիր կուտակայինի դեմ պայքարող «Դեմ եմ» նախաձեռնության թիկունքում, և առաջարկեց այդ իսկ պահին գնալ ցանկացած բնակավայր ու տեսնել, տեղում համոզվել՝ ում են վստահում մարդիկ, ում՝ ոչ: Դրա վկայությունը, ըստ պատգամավորի, միայն ՀԱԿ-ի նախաձեռնած մարտիմեկյան հանրահավաքին տասնյակ հազարավոր մարդկանց ներկայությունն էր, «էլ ուր մնաց, որ կազմակերպեին չորս ուժերով միասին», ուստի խորհուրդ տվեց նախարարին՝ խոսելուց առաջ մտածել:
