Երևանի հին ու մաշված, մահաբեր վերելակների վթարներից գրանցվում են նորանոր մահվան դեպքեր։ Վերջին թարմ դեպքը հուլիսի 28-ին էր։ Երևանում վերելակի պոկվելու հետևանքով տուժած 45–ամյա քաղաքացին «Էրեբունի» ԲԿ-ու մահացել էր։
Վերջերս քաղաքապետ Հայկ Մարությանը, անդրադառնալով վերելակների խնդրին, նկատել էր, որ իրենք առաջին օրվանից սկսած ծրագիր են գրում, որ վերելակներն ամբողջությամբ փոխարինվեն, բայց այս հարցում իրենց հետ պետք է համագործակցեն նաև բնակիչները: «Ծրագիրը երբ պատրաստ կլինի, մենք այն կներկայացնենք կառավարությանը, որովհետև քաղաքային իշխանությունները միայնակ ի զորու չեն այս հարցը լուծել, սա տասնյակ միլիոնավոր դոլարներին համարժեք ներդրում է պահանջում: Քանի որ վերելակները պատկանում են բնակիչներին, մեր հարցն է. մենք փոխարինենք վերելակը, և բնակիչները տարիների ընթացքում այդ տարիների գումարը վճարեն, քանի որ այդ վերելակն իրենցն է լինելու»,- հայտնել էր քաղաքապետը: Նա նաև նշել էր, որ այս պահին գույքագրում է իրականացվում, միաժամանակ բանակցություններ են տարվում վերելակ արտադրողների հետ:
Երևանի քաղաքապետի խոսնակ Հակոբ Կարապետյանը «Առաջին լրատվական»-ի հետ զրույցում ասաց, որ գույքագրման գործընթացն ավարտվել է, քաղաքապետարանն արդեն հստակ պատկերացում ունի, թե ինչի հետ գործ ունի։ Մասնավորապես, արդեն հստակ է, որ Երևան քաղաքում մոտ 3500 վերելակ ենթակա է փոխելու, և փոխելու ուղղությամբ արդեն իսկ պիլոտային ծրագիր է իրականացվում: «Այս պահին արդեն 20 վերելակ է փոխարինվելու Երևանի տարբեր վարչական շրջաններում։ Ծրագիրը պիլոտային է լինելու՝ հասկանալու, վեր հանելու հետագա խնդիրները։ Եթե չեմ սխալվում, մոտ օրերս այդ պիլոտային ծրագրի շրջանակներում մեկ վերելակ կտեղադրվի»,- ասաց քաղաքապետի խոսնակը։
Հակոբ Կարապետյանի խոսքով՝ քաղաքապետարանը մշակել է մոդել, որով բազմաբնակարան շենքերի համատիրությունները կարող են ձեռք բերել վերելակներ և փոխարինել հները, և դա լինի համեմատաբար մատչելի։ «Ըստ այդ մոդելի՝ պետք է առաջ գնալ, և հենց դրա շրջանակներում քաղաքապետարանը կսկսի 20 վերելակի փոխարինումը»,- նշեց Կարապետյանը՝ հավելելով, որ պիլոտային ծրագրի հաջող իրականացման դեպքում արդեն մրցույթ կհայտարարվի, և մրցութային կարգով կիրականացվի վերելակների գնումը համապատասխան ընկերություններից։
Երևանի ավագանիում ընդդիմադիր «Լույս» խմբակցության ղեկավար Դավիթ Խաժակյանի համար, այնուամենայնիվ, մի շարք անհասկանալի հարցեր կան վերելակների փոփոխության և մշակված մոդելի շուրջ։ Այս թեմաներով որևէ քննարկում ավագանու հետ չի եղել: «Թե ինչ կառավարման մոդելով է իրականացվելու այդ փոփոխությունը՝ անհայտ է։ Իրենք ասում են, որ մրցույթ են հայտարարել, պատվիրել են վերելակներ, որը կբերեն, կտեղադրեն, նոր կհասկանան՝ ինչպես անել, բայց, այդուհանդերձ, ինձ համար անհասկանալի է, թե ներդրման ինչ մոդել է լինելու, և ով է սպասարկելու այդ վերելակները։ Այս հարցերի պատասխաններն են, որ կցանկանայի իմանալ։ Մնացած հարցերն ածանցվում են սրանց»,- «Առաջին լրատվական»-ի հետ զրույցում ասաց Խաժակյանը։
Նրա խոսով՝ եթե քաղաքապետարանը որոշել է տեղադրել նոր վեևրելակներ և դրանց փոխարինման կամ հետագա շահագործման գործառույթը տալ համատիրություններին, ապա այդ մոդելը գործող համատիրությունների պարագայում լինելու է ոչ արդյունավետ լուծում։ «Դա կլինի ոչ արդյունավետ լուծում մի կողմց, իսկ մյուս կողմից՝ ինձ համար անհասկանալի է, թե այդ քանակությամբ վերելակի ներդրումն ով է անելու. բավական մեծ գումարի մասին է խոսքը։
Եթե կառավարությունը պետք է տա այդ գումարը, դա իրատեսական չեմ համարում։ Մյուս կողմից էլ՝ հասկանալի է, որ դա մեծ ենթակառուցվածք է, և ներկա համատիրությունը չի կարող այն փոխարինել և իրականացնել հետագա սպասարկում։ Այդ ենթակառուցվածքի սպասարկումն էլ պետք է իրականացնի մասնագիտացված օպերատոր։ Եթե մենք պետք է փոխարինենք վերելակները և դրանց սպասարկումը տանք համատիրություններին, ապա մենք վաղ թե ուշ կրկին կանգնելու ենք նույն խնդրի առաջ, որովհետև եթե սպասարկումը պետք է լինի ոչ պարբերական, իրավիճակային, ինչպես հիմա, ապա ելքը լինելու է նույնը։ Այդ պատճառով ինձ համար հասկանալի չէ իրենց մոդելը, տեսլականը»,- նկատեց Խաժակյանը՝ հավելելով, որ այսքան ժամանակ այս թեմայով ոչ մի ծրագիր, հայեցակարգ չի ներկայացվել, որից կարելի էր հետևություն անել։
