Գյումրու «Շիրակ» ֆուտբոլային ակումբի գլխավոր մարզիչ Վարդան Բիչախչյանը գոհ չէ ակումբի ուսումնամարզական հավաքից, որով թիմը նախապատրաստվել է Հայաստանի առաջնության բարձրագույն խմբի մեկնարկին:
Լրագրողների հետ զրույցում Բիչախչյանը շեշտեց, որ հավաքն անցկացրել են ռուսական Կրիմսկ քաղաքում, որի ընթացքում սպասվածից քիչ ընկերական խաղեր են անցկացրել:
«Մինչ առաջնության մեկնարկը ֆուտբոլիստները 3 օր հանգիստ ունեն, որից հետո նորից կսկսենք նախապատրաստվել Հայաստանի առաջնությանը: Այս պահի դրությամբ դեռ մի քանի ֆուտբոլիստների հետ կապված հարցեր կան, որոնք չենք բարձրաձայնում: Հույս ունեմ, որ «Բանանց»-ի դեմ տնային խաղից առաջ կունենանք վերջնական պատկերը, թե ինչ թիմով ենք մասնակցելու գալիք առաջնությանը»,-ասաց մասնագետը:
Բիչախչյանի խոսքով` մեկնարկող առաջնությունում ոչ մի թիմ չի ուզում ետ մնալ մրցակցությունից: «Իմ կարծիքով, մեկնարկող առաջնությունում առավելություն կարող է ունենալ «Արարատ-Արմենիա»-ն, բայց ամեն ինչ որոշվելու է դաշտում: Պարզ է, որ մեզ մոտ անցած տարվա համեմատ ակնկալիքներն ավելի շատ են լինելու (նախորդ մրցաշրջանում «Շիրակ»-ը 7-րդն էր-հեղ.)»,-առանձնացրեց նա:
«Այժմ, ընդհանուր առմամբ, չեմ կարող թիմի ներուժը գնահատել: Սակայն «Շիրակ»-ը չի հրաժարվելու իր որդեգրած կադրային քաղաքականությունից` առաջին հերթին խաղալու հնարավորություն կտանք խոստումնալից հայ երիտասարդներին»,-եզրափակեց նա:
Ֆուտբոլի Հայաստանի առաջնության բարձրագույն խմբի 2019/20 մրցաշրջանի անդրանիկ տուրում «Շիրակ»-ը օգոստոսի 2-ին կհյուրընկալի «Բանանց-ին»: