Բեռլինում նախատեսվում է քանդել նացիստական Ռեյխսկանցլերիայի՝ Կայսերական գրասենյակի հետ կապված բունկերը՝ բնակելի համալիրներ կառուցելու համար։
Սա Ադոլֆ Հիտլերի իշխանության նախկին կենտրոնի վերջին պահպանված տարրերից մեկն է։ Նացիստական առաջնորդի՝ Բեռլինի կենտրոնում գտնվող գրասենյակից բունկերից բացի գրեթե ոչինչ չի մնացել. գրում է BBC-ն՝ հավելելով, որ այժմ այն ցանկանում են քանդել՝ բազմաբնակարան շենքեր և գրասենյակներ կառուցելու համար։
Ռեյխսկանցլերիայի նոր շենքը, որը կառուցվել էր Հիտլերի սիրելի ճարտարապետ Ալբերտ Շպեերի կողմից, ծանր վնասվել էր Երկրորդ համաշխարհային պատերազմի վերջում, իսկ 1949 թվականին քանդվել խորհրդային զորքերի հրամանով։
Այնուամենայնիվ, բունկերը մինչ օրս երևում է ամայի տարածքում։
Սենատոր Քրիստիան Գեբլերը կարծում է, որ այս վայրը կարող է ուխտագնացության օբյեկտ դառնալ։ Քանդման հակառակորդները, այդ թվում՝ Բեռլինի «Ստորգետնյա աշխարհ» ասոցիացիայից Դիտմար Արնոլդը, այս քայլն անվանում են «բացարձակ խենթություն» և առաջարկում են բունկերը վերածել թանգարանի։ Հուշարձանների հարցերով Բեռլինի պետական խորհուրդը նույնպես դեմ է արտահայտվել քանդմանը՝ նշելով օբյեկտի պատմական արժեքը։
Արնոլդը վերջին անգամ բունկեր է այցելել 2007 թվականին, և, նրա խոսքով, այն շատ լավ վիճակում էր։
Նա նշել է, որ սա այն ավելի հայտնի «Ֆյուրերի բունկերը» չէ, որտեղ Հիտլերն ու Եվա Բրաունը ինքնասպանություն գործեցին, և որը գտնվում է մոտ 120 մետր դեպի հյուսիս։ Այս բունկերն օգտագործվել է Ռեյխսկանցլերիայի աշխատակիցների կողմից։ Պատերազմի վերջում կառույցի ներսում հոսպիտալ էր ստեղծվել։
Ըստ Արնոլդի՝ բունկերային համալիրի 1200 քառակուսի մետր տարածքը մնացել է անձեռնմխելի. պատերի և առաստաղի հաստությունը 1,7 մետր է։
Նա կարծում է, որ հնարավոր կլիներ նույնիսկ կառուցապատում անել դրանց վրա՝ առանց ամբողջ բունկերը քանդելու։
