«ՍԴ նախագահ Հրայր Թովմասյանի հարցազրույցը վկայեց, որ նա չի պատրաստվում հանձնվել։ Նա մինչև վերջ փորձելու է «ճակատամարտ» տալ ընդդեմ գործող իշխանությունների»,-«Առաջին լրատվական»-ի հետ զրույցում նման կարծիք հայտնեց քաղաքագետ Գագիկ Համբարյանը։
Մեր զրուցակիցը կարծում է, որ այս հարցազրույցը չպետք է ընդհանրացնել և դիտարկել որպես նախկին համակարգի պատասխան.«Սա ըստ իս՝ կոնկրետ Հրայր Թովմասյանի պատասխանն է Նիկոլ Փաշինյանի հարցազրույցին»։
Քաղաքագետը ստեղծված իրավիճակի համար մեղադրում է նաև գործող իշխանություննեին.«Ինչպես տեսնում ենք վարչապետ Նիկոլ Փաշինյանն ամենատարբեր դրվագներում շատ նորմալ համագործակցում է նախկին իշխանությունների ներկայացուցիչների հետ՝ այդ թվում գլխավոր դատախազ Արթուր Դավթյանի. այս դեպքում համագործակցությունն արդյունավետ է։ Փաստենք, որ այն անձինք, որոնք անցնում են նրա սրի տակով համարվում են նոր իշխանության մաս, իսկ որոնք ոչ՝ պիտակավորվում են և հռչակվում որպես հակահեղափոխականներ և այս իշխանություններին հակառակորդ համարվող ուժի ներկայացուցիչ»։
Ըստ Համբարյանի՝ Հրայր Թովմասյանը ո՛չ ժխտում և ո՛չ էլ հաստատում է իր հրաժարականի հնարավորությունը.«Եթե հիշում եք նա այդ հարցին ի պատասխան ասել էր՝ բացառված չէ, որ վաղը կարող է երկրաշարժ լինել։ Փաստենք՝ ի տարբերություն ԲԴԽ ներկայացուցիչների, որոնք արագ կապիտուլյացիայի ենթարկվեցին, ես որքան նկատում եմ՝ նա մինչև վերջ փորձելու է «ճակատամարտ» տալ գործող իշխանություններին և այդ «ճակատամարտի» արդյունքում նոր կորոշի՝ հանձնվե՞լ, թե՞ ոչ»։
Գագիկ Համբարյանի համար խնդրահարույց է ԱԺ փոխնախագահ Լենա Նազարյանի դիտարկումը, որ եթե Հրայր Թովմասյանը հրաժարական չտա, իրենք ստիպված կլինեն սահմանադրական փոփոխություններ իրականացնել. «Նա ասում է՝ կա երկու ճանապարհ։ Կա՛մ Հրայր Թովմասյանը հրաժարական է տալիս, կա՛մ իրենք սահմանադրական փոփոխություններ են իրականացնում։ Լավ կարելի՞ է այսքան անլրջացնել։ «Ազատություն» ռադիոկայանին տված հարցազրույցում պարոն Փաշինյանը չքննադատեց Սահմանադրությունը, որը ժամանակին ասում էր, թե Սերժ Սարգսյանի հագով կարած կոստյում է։ Հիմա ի՞նչ է ստացվում Սահմանադրական դատարանը սեփականաշնորհելու համար պետք է փոփոխություննե՞ր անել, ես այդ ճանապարհն ընդունելի չեմ համարում»,-եզրափակեց նա։