Եկող շաբաթ հայկական երեք ակումբները՝ «Արարատ-Արմենիան», «Փյունիկն» ու «Ալաշկերտը» պայքարը կսկսեն Եվրոպա լիգայի խաղարկության որակավորման երկրորդ փուլում: Հիշեցնենք, որ «Արարատ-Արմենիան» Եվրոպա լիգայում հայտնվել է Չեմպիոնների լիգայի խաղարկության որակավորման առաջին փուլում Շվեդիայի չեմպիոն ԱԻԿ-ից երկու հանդիպումների արդյունքում 4:3 հաշվով կրած պարտության հետևանքով: Եվրոպա լիգայում «Արարատ-Արմենիայի» մրցակիցը Ջիբրալթարի չեմպիոն «Լինկոլն Ռեդ» ակումբն է: Վերջինս Չեմպիոնների լիգայի խաղարկության առաջին փուլում երկու հանդիպումների արդյունքում 5:0 հաշվով զիջել էր Սլովենիայի չեմպիոն «Մարիբորին»:
«Լինկոլն Ռեդը» հանդիսանում է կիսասիրողական ակումբ, ուստի Հայաստանի չեմպիոնի Եվրոպա լիգայի որակավորման երրորդ փուլում հայտնվելու հավանականությունն ավելի քան մեծ է: «Արարատ-Արմենիան» լուրջ դիմադրություն ցույց տվեց ԱԻԿ-ին և մոտ էր հաղթանակին, բայց․․․: Նշենք, որ «Արարատ-Արմենիայի» համար լավ հնարավորություն է ստեղծվել լուրջ արդյունքներ գրանցել Եվրոպա լիգայի խաղարկությունում: Մեր երեք թիմերից այս պահին ամենահարմար վիճակում հենց «Արարատ-Արմենիան» է: «Ալաշկերտին» և «Փյունիկին» բավական լուրջ մրցակիցներ են բաժին հասել: Մասնավորապես, «Ալաշկերտի» մրցակիցը Ռումինայի ամենահայտնի և տիտղոսակիր «Ստյաուա» թիմն է: Վերջինս Ռումնիայի փոխչեմպիոնն է: Չեմպիոնության համար պայքարում «Ստյաուան» լարված պայքարում զիջել էր «Կլուժին»: Անցյալ տարի Եվրոպա լիգայի խաղարկության որակավորման երրորդ փուլում «Ալաշկերտին» բաժին էր հասել հենց «Կլուժը»: Երևանում 0:2 հաշվով պարտվելուց հետո «Ալաշկերտը» Ռումինիայում զիջել էր ջախջախիչ 5:0 հաշվով: Ինչպես և «Ալաշկերտը» «Ստյաուան» Եվրոպա լիգայում պայքարը սկսել է որակավորման առաջին փուլից: Մեր առաջիկա մրցակիցը երկու հանդիպումների արդյունքում 4:1 հաշվով առավելության է հասել մոլդովական «Միլսամիի» նկատմամբ: Նշենք նաև, որ որակավորման առաջին փուլում «Ալաշկերտը» լավ տպավորություն թողեց՝ ցույց տալով որ վերելքի շրջանում է: Ու չնայած որ մրցակիցը զորեղ է, այնուամենայնիվ մեր ակումբը կարծում ենք կարող է պայքարել որակավորման երրորդ փուլի ուղեգրի համար: Հայաստանի փոխչեմպիոն «Փյունիկը» կմրցի չեխական «Յաբլոնեցի» հետ: Վերջինս Եվրոպա լիգայում պայքարը սկսելու է հենց որակավորման երկրորդ փուլից: Չեխիայի ավարտված առաջնությունում «Յաբլոնեցը» զբաղեցրել է 4-րդ հորիզոնականը՝ առջևում թողնելով հեղինակավոր երեք ակումբներին՝ «Սլավիային», Պլզենի «Վիկտորիային» և Պրահայի «Սպարտային»:
Նշենք, որ Չեխիայի առաջնությունը վերջին տարիներին որակական զգալի աճ է գրանցել: Վերոնշյալ երեք ակումբները վերջին շրջանում բավական հաջող են ելույթ ունենում եվրագավաթների խաղարկություններում: «Յաբլոնեցը» դավանում է արագ և ինչ-որ տեղ կոշտ ֆուտբոլ: Այս թիմի կորիզը կազմում են տեղացի ֆուտբոլիստները: Ինչպես և «Ալաշկերտը»՝ որակավորման առաջին փուլում հատկապես երկրորդ խաղում «Փյունիկը» գրագետ և տպավորիչ խաղ ցուցադրեց: Այս թիմում ևս նկատելի է վերելքի տենդենցը: Հետևաբար այդ դիմակայությունում կողմերի հնարավորությունները կարելի է գնահատել 50-ը 50-ի: Վիճակահանության արդյունքում մեր բոլոր երեք թիմերը առաջին հանդիպումներն անց են կացնելու տանը: «Արարատ-Արմենիա»-«Լինկոլն Ռեդ» հանդիպումը տեղի կունենա հուլիսի 23-ին՝ ժամը 19:00-ին, Ավանի Ակադեմիայում:
Հուլիսի 25-ին կրկին Ավանի Ակադեմիայում ժամը 21-ին «Ալաշկերտը» կխաղա «Ստյաուայի» հետ: Նույն օրը ժամը 17:30-ին Գյումրիի մարզադաշտում «Փյունիկը» կհյուրընկալի «Յաբլոնեցին»: Կապված Երևանում ընթացող մինչև 19 տարեկանների Եվրոպայի առաջնության հետ, հայկական ակումբները եվրագավաթներում կանգնել են լուրջ խնդրի առաջ: Ու փաստորեն Երևանում ազատ մարզադաշտ չլինելու պատճառով երկրորդ հանդիպումն անընդմեջ «Փյունիկը» ստիպված է լինելու խաղալ Գյումրիում:
Հուսանք, որ մեր թիմերին կհաջողվի դուրս գալ Եվրոպա լիգայի որակավորման երրորդ փուլ և ֆուտբոլասերը հնարավորություն կունենա մեր թիմերի հանդիպումները հետևել Երևանում՝ «Հանրապետական» մարզադաշտում: