«Վարչապետի որոշմամբ ստեղծված հակակոռուպցիոն քաղաքականությունների խորհուրդը նախկինի կրկնությունն է։ Նախկին կառույցը 1.5 տարի չէր աշխատել, և վարչապետի որոշմամբ այդ կառույցին կենդանություն տրվեց, որը, մեր կարծիքով՝ հետքայլ է թավշյա հեղափոխության արժեքներից՝ իր ձևավորման բնույթով և գործընթացներով։ Այդ գործընթացում ՀԿ-ների ընտրության պրոցեսը ոչ թափանցիկ է, ոչ ճիշտ է, իսկ գործառույթները որոշ առումով կրկնում են կոռուպցիայի կանխարգելման հանձնաժողովի ֆունկցիաներին»,- «Առաջին լրատվական»-ի տաղավարում տեղի ունեցած քննարկման ժամանակ ասաց «Տնտեսական իրավունքի կենտրոն» ՀԿ նախագահ Մովսես Արիստակեսյանը, որի կազմակերպությունը անդամ է նաև Հայաստանի ՔՀԿ-ների հակակոռուպցիոն կոալիցիային։
Քննարկմանը մասնակից Իրավաբանների հայկական ասոցիացիայի իրավաբան փորձագետ Արտյոմ Մեսրոպյանը ևս նկատեց, որ հակակոռուպցիոն քաղաքականության խորհրդի և նախկինում եղած կոռուպցիայի դեմ պայքարի խորհրդի ֆունկցիաները, ըստ էության, նույնն են, բայց չգիտես ինչու, կառավարությունը որոշում կայացրեց փոխել այդ կառույցի անունը և պահպանել կառույցը։ Առկա մի շարք անհստակությունների պատճառով էլ Հայաստանի ՔՀԿ-ների հակակոռուպցիոն կոալիցիան որոշում է կայացրել չմասնակցել խորհրդի աշխատանքներին և նույն կոչով դիմել է նաև կոալիցիայի անդամ ՀԿ-ներին։ Հետևելով կոչին, կոալիցիայի անդամների ՀԿ-ները չեն մասնակցել արդարադատության նախարարության կողմից հայտարարված մրցույթին, որի արդյունքները, ի դեպ, առ այսօր հայտնի չեն և պարզ չէ, թե որ ՀԿ-ներն են մասնակցել մրցույթին, որոնք են հաղթել, ինչ չափանիշներ ապահովելով։
Մեսրոպյանը նշեց, որ այս պրոցեսից ակնհայտ է դառնում, որ կոնկրետ նպատակ կար խորհրդի կազմից դուրս թողնել Հանրային խորհրդին, Համայնքների միությանը և ՔՀԿ-ների հակակոռուպցիոն կոալիցիային։ «Գործընթացը տեղի է ունեցել որոշակի ուղղորդվածությամբ»,- նկատեց հակակոռուպցիոն փորձագետը՝ հավելելով, որ այս օրերին Հայաստանում հակակոռուպցիոն մարմինների ստեղծման շուրջ տեղի ունեցող գործընթացների մասին Հակակոռուպցիոն կոալիցիան տեղյակ է պահել միջազգային բոլոր կառույցներին, որոնց հետ ներկայումս կոմունիկացիա է իրականացվում այս թեմայով։
Մովսես Արիստակեսյանն էլ նշեց, որ Հայաստանում հակակոռուպցիոն պայքար մղելու վերաբերյալ հանձնառությունը առայժմ նկատվում է միայն հայտարարությունների մակարդակում, կամք կա, բայց գործնականում արդյունք չկա, որի վառ ապացույցը, Արիստակեսյանի խոսքերով, այս օրերին տեղի ունեցող պրոցեսներն են։ «Կոռուպցիայի դեմ պայքարի ինստիտուտների ձևավորումն ուղեկցվում է շահերի բախմամբ և կոռուպցիոն ռիսկերով»,- նկատեց Արիստակեսյանը։
Առավել մանրամասն՝ տեսանյութում։