ՀՀ վարչապետ Նիկոլ Փաշինյանը Լոռու մարզի «Հայաստանի մանուկներ» բարեգործական հիմնադրամի (ՔՈԱՖ) ՍՄԱՐԹ կենտրոն կատարած այցելության ժամանակ նշեց՝ ուրախ է, որ պատեհ առիթ ընձեռնվեց և տեղի ունեցավ այս հանդիպումը:
«Ես սպասում էի այս հանդիպմանը, շատ էի լսել՝ ինչ է կատարվում, և այստեղ տեսա մոտավորապես այն, ինչ սպասում էի, չեմ ուզում ասել՝ տեսա ավելին, ինչ սպասում էի, գիտեի, որ այն առավելն, ինչ սպասում էի, պիտի տեսնեի: Առանձնահատուկ շնորհակալություն եմ հայտնում գործադրած ջանքի համար, որ այստեղ՝ Հայաստանի սրտում, սա Թումանյանի ծննդավայրն է, վերածննդի այսպիսի անկյունաքար ունենք»,- ասաց նա:
Փաշինյանն ընդգծեց՝ Հայաստանում տեղի ունեցած հեղափոխության տնտեսական հիմքը այն մարդիկ են, ովքեր գիտության, կրթության, բիզնեսի ոլորտում ցուցաբերել են նախաձեռնություններ, որոնք դուրս են եղել ավանդական օլիգարխիկ-կոռումպացված տրամաբանության շրջանակներից: Ըստ վարչապետի՝ ամենակարևոր նախաձեռնությունը, որ հեղափոխական նշանակություն է ունեցել, Սփյուռքի մի շարք գործիչների վերաբերմունքի փոփոխությունն է Հայաստանում անելիքի վերաբերյալ: