Խնդիրը Մադրիդյան սկզբունքները չեն. ԼՂ հակամարտող կողմերը փոխզիջման ցանկություն չունեն: Այսօր «ՆԱՏՕ-Հարավային Կովկաս՝ ռազմավարական մոտեցումներ տարածաշրջանի անվտանգությանը» միջազգային կոնֆերանսի աշխատանքային երկրորդ օրվա ընթացքում այս մասին ասաց ռուսաստանցի փորձագետ Սերգեյ Մարկեդոնովը՝ պատասխանելով ՀՀ ԱԱԾ նախկին ղեկավար Դավիթ Շահնազարյանի հարցին, թե կա՞ն արդյոք մադրիդյան սկզբունքներ ԼՂ հակամարտության բանակցային սեղանին, քանի որ այնպիսի տպավորություն է, որ դրանք այլևս սեղանին չեն:
Նա նշեց, որ խնդիրը Մադրիդյան սկզբունքները չեն: «Փոխզիջման ցանկություն չեմ տեսնում ոչ Հայաստանում, ոչ Ադրբեջանում: Կարող են ՌԴ-ն, Վաշինգտոնը խանգարել կամ օգնել գործընթացին, բայց եթե իրենք որևէ ձևաչափ չգտնեն, գործընթացն առաջ չի գնա: Չեմ կարծում, որ դրանք դուրս են գործընթացից, դրանք դեռ սեղանին են, պարզապես կողմերի մոտ չկա փոխզիջման գնալու ցանկություն»,- ասաց Մարկեդոնովը:
