«Ժողովուրդ» թերթը զրուցել է «Քաղաքացիական պայմանագրի» ներկայացուցիչ Ալեն Սիմոնյանի հետ:
–Պարոն Սիմոնյան, հնարավո՞ր է «Քաղաքացիական պայմանագիրը»-ը խոչընդոտի «Դեմ եմ» նախաձեռնության հետագա ընթացքին ու պատճառ դառնա, որ շարժումը «թուլանա»:
-Նախ ասեմ, որ դա առաջին հերթին պետք է որոշեն «Դեմ եմ» նախաձեռնության անդամները, դա իրենց որոշելիքն է: Բայց ես չեմ հասկանում տրամաμանությունը, այսինքն, եթե, օրինակ, ՀՅԴ անդամ Վահան Հովհաննիսյանն այժմ ներկայացնում է Սերժ Սարգսյանին՝ Գերմանիայում, արդյոք դա թուլացնո՞ւմ է դաշնակցությանը, որպես ոչ իշխանական ուժ,ինչպես իրենք են սիրում արտահայտվել:
-Նախօրեին ԱԺ 4 ոչ իշխանական ուժերը վերջապես որոշեցին ՀՀ վարչապետ Տիգրան Սարգսյանի կառավարությանն անվստահություն հայտնել: «Քաղաքացիական պայմանագիր»-ը ի՞նչ դիրքորոշում ունի այդ հարցի շուրջ:
-Ուզում եմ խնդրել, որ այդ պահանջին ավելացնեն նաև մեր շենքի լիազոր տիկին Ռոզայի հրաժարականի պահանջը: Ես անլուրջ եմ վերաբերվում ու համարում եմ, որ այս գործընթացի կազմակերպիչների գաղափարական կյանքը շատ կարճ է տևելու, որովհետև նախանշված ամսի 28-ին, որը լինելու է այդ հարցի քննարկման օրը, հաջորդելու են ամսի 29-ը և մնացած օրերը, ու պարզ է դառնալու, որ դա վակուումը լցնելու ևս մեկ անգամվա փորձ էր: Ոչինչ ավելի:
–Իսկ ի՞նչն է Ձեզ ստիպում անլուրջ վերաբերվել այդ որոշմանը: Գուցե կուսակցությունների գործունեությու՞նն է ստիպել նման եզրակացության գալ:
-Անլրջությունն այն է, որ պայքարում են Տիգրան Սարգսյանի դեմ, այն պարագայում, երբ բոլորին հայտնի է, որ Տիգրան Սարգսյանը ոչ մի բան չի որոշում: Փաստացի ԵԿՄ համագումարի ժամանակ Սերժ Սարգսյանը հայտարարեց, որ բարձրացված բոլոր խնդիրներին ինքը տեղյակ է և ինքն է որոշումներ կայացնում: Դա ասվել է բառացիորեն, ու այդքանից հետո նման հայտարարությամբ հանդես գալը, կարծում եմ, անլրջություն է: Տիգրան Սարգսյանի փոխարեն լինի Սարգիս Տիգրանյանը` մեկ է, որևիցե բան չի փոխվելու, թիրախն ուրիշ տեղ է: Սա ընդամենը չարաճճիություն է, որը ողջունելի չէ մեր այսօրվա իրավիճակում: Երբ մարդիկ այսքան հուսահատված են, իսկ այդ քաղաքական ուժերն իսկական չարաճճիությամբ են զբաղվում, դա մարդկանց հիասթափեցնում է: Մեր իրական թիրախը իշխանափոխությունն է, ոչ թե անձափոխությունը, մեկով մյուսին փոխարինելու խնդիր դրված չէ: Այսինքն՝ Տիգրան Սարգսյանի հրաժարականը հնարավոր է միայն այն պարագայում, երμ որ քաղաքական մեծամասնության կամքը լինի:
Հարցազրույցն ամբողջությամբ՝ թերթի այսօրվա համարում։
