ՀԱԿ անդամ Գուրգեն Եղիազարյանն ու ԱԺ ՀՀԿ խմբակցության պատգամավոր Համլետ Հարությունյանն այսօր լրագրողների հետ հանդիպման ժամանակ անդրադարձան արտահերթ ընտրությունների հավանականությանը:
Եղիազարյանը նշեց, որ ՀԱԿ-ը միայն մեկ բանի համար է արտահերթ ընտրություններ ուզում, որ երկիրը դուրս գա ներկայիս իրավիճակից, և հենց դրա համար էլ ուզում են երկխոսել իշխանությունների հետ, թե ինչպես են գնալու ընտրությունների: Եղիազարյանը, հիշելով ԿԸՀ չինովնիկներից մեկի հայտարարությունը, թե մեր վստահված անձինք ավելի լայն հնարավորություններից են օգտվում, քան թե միջազգային դիտորդները, նկատեց.
«Երևի նա մոռացել է, որ նախկին ընտրությունների ժամանակ մեր վստահված անձանց ընտրական հանձնաժողովներից առևանգում տանում էին ջիպերով»:
Հարությունյանն էլ արձագանքեց, թե ինքր զարմացած է, որ Եղիազարյանը նոր է նկատել այդ խախտումները. «Ընենց էլ մի զարմացած ասում ես՝ ընտրախախտումներ, անցյալում էլ է նման բան եղել: Միայն մի բան կասեմ` հիշեք անցյալը և նոր գնահատեք ներկան ու ապագան»:
Եղիազարյանն էլ արձագանքեց, որ եթե նախկինում սխալներ եղել են, ապա իշխանությունները դա պետք է վերացնեն և այլևս չկրկնեն. «Նախկինում ոչ մեկը փողոցում չէր գնդակահարում անմեղ մարդկանց, հետո շառով չէր տալիս մնացածներին: Նախկինում չեն բռնել մարդկանց ու հետո ազատել, մինչև հիմա նստած են մեր բռնածները: 131 հոգի մարդ բռնեցիք, հենց այնպես պահեցիք, հետո եվրոպացիների աչքին երևալու համար այդ մարդկանց ազատ արձակեցիք, իբր թե բարի կամքի դրսևորում է: Ի՞նչ բարի կամք, ո՞ւր են Մարտի 1-ի հանցագործները»:
Համլետ Հարությունյանի գնահատմամբ՝ ծայրահեղ քայլերի ժամանակն արդեն վաղուց անցել է, և այսօր արտահերթ ընտրություններ անցկացնելու որևէ հիմք չկա: Եղիազարյանն էլ արձագանքեց. «Չէ, շատ սոված մարդիկ կան, այնպես արեք՝ ժողովուրդը ապրի: Իշխանություն եք, բարի կամք դրսևորեք, ձեր շրջապատին միանգամից ասեք` տղերք, այսպես ապրել չի լինի»: Եղիազարյանը նաև ընդգծեց, որ դեպքերը շատ արագ են զարգանում և թող այնպես չանեն, որ սեպտեմբերին ՀԱԿ-ը ծայրահեղ քայլերի դիմի:
Հարցին, թե ինչպես են վերաբերվում սոցիոլոգիական այն հարցումներին, որոնց համաձայն՝ արտահերթ ընտրությունների դեպքում որպես նախագահի ամենահավանական թեկնածու է դիտվում ԲՀԿ առաջնորդ Գագիկ Ծառուկյանը, Եղիազարյանը պատասխանեց. «Ինչ վերաբերում է էդ Ադիբեկին և ադիբեկանմաններին, ապա նրանց ընդհանրապես ես չեմ ուզում մեկնաբանել: Ձեր հարցի հիմքում ընկած է ադիբեկատիպի սոցհարցումների արդյունքները, ինչը ծիծաղելի է»:
ՀՀԿ-ական պատգամավոր Համլետ Հարությունյանի գնահատմամբ էլ, այսօր Սերժ Սարգսյանը քաղաքական այլընտրանք չունի:
«Այլընտրանք չունի՝ թող գա արտահերթ ընտրությունների, և տեսնենք, թե այդ այլընտրանք չունեցողը քանի՞ տոկոս է հավաքելու»,- արձագանքեց Եղիազարյանը:
Անդրադառնալով ՀՀԿ-ական Գալուստ Սահակյանի՝ օրերս արած այն հայտարարությանը, թե իրենք պատրաստ են գնալ ՀԱԿ-ի հետ Սևանի հանրային լողափեր և այնտեղ երկխոսել, Եղիազարյանը նշեց. «Մադագասկարի նախագահը որ փախել է, այ նրա Գալուստ Սահակյանը երկու օր առաջ ուրիշ բան էր խոսում»:
