Ադրբեջանական Day.az-ին տված հարցազրույցում ազգային էներգետիկ անվտանգության հիմնադրամի հիմնադիր ու գլխավոր տնօրեն, ռուս քաղաքագետ և տնտեսագետ Կոնստանտին Սիմոնովն անդրադարձել է ղարաբաղյան հակամարտության կարգավորմանը.
«Ռուսաստանը լրջորեն հիասթափված է Կազանի հանդիպումից։ Նա մեծ հույսեր էր տածում, թե այդ հանդիպման ժամանակ կստորագրվի փաստաթուղթ, որը կդառնա հակամարտության կարգավորման «Ճանապարհային քարտեզ»։
Ես բազմիցս կրկնել եմ, որ չեմ հասկանում, թե ինչպես կարելի է բանակցությունների ճանապարհով լուծել այդ խնդիրը։ Անգամ այն «Ճանապարհային քարտեզում», որը, կարծես թե, հրամցվում էր կողմերին, կային բազմաթիվ խնդրահարույց հարցեր։ Օրինակ՝ այնտեղ խոսք էր գնում ադրբեջանցի փախստականների վերադարձի մասին, ինչի շուրջ կողմերի մոտ առաջանում էին մի շարք խնդիրներ։ Դա և մյուս հարցերը «Ճանապարհային քարտեզի» կնքման դեպքում կարող էին վերածվել վառոդով լի տակառի, որը հետագայում՝ անգամ ստորագրումից հետո, կպայթեր ցանկացած պահի։
Մոսկվայում կայացած մամլո ասուլիսի ժամանակ Լավրովը հայտարարեց, թե շուտով մենք ականատես կլինենք հակամարտության կարգավորման հերթական ակտիվացմանը։ Ես չեմ կարծում, թե Կազանի հանդիպումից հետո հիասթափված Մեդվեդևը կարող է մոտ ապագայում վերադառնալ խնդրի կարգավորմանը։ Սեպտեմբերին Ռուսաստանում մեկնարկում է ընտրական կամպանիան։
Կարևոր չէ՝ նա մասնակցելո՞ւ է դրան, թե՞ ոչ, այնումենայնիվ, նա կներգրավվի ընտրական գործընթացում։ Դա նշանակում է, որ նրա համար կփոխվի խնդիրների առաջնահերթությունը։ Իսկ Լավրովի հայտարարությունը ես որակում եմ որպես լավ ական վատ խաղում։
Ես հակամարտության կարգավորման շուրջ որևէ ակտիվացում չեմ ակնկալում։ Ռուսական կողմից բեկումնային առաջարկներ չեն լինի։ Ինչպիսի՞ առաջարկներ կարելի է անել այժմ։ Առաջարկվել են բոլոր հնարավոր տարբերակները, և եթե դրանք չեն արժանացել կողմերի հավանությանը, ես չեմ պատկերացնում, թե էլ ինչ կարելի է առաջարկել։ Այնպես որ, ես որևէ հրաշք չեմ ակնկալում միջնորդներից, այդ թվում՝ նաև Ռուսաստանից»։