«Առաջին 5 ամսվա տվյալները ցույց են տալիս, որ գնում ենք ճիշտ ուղղությամբ։ Հեղափոխությունից հետո 1 տարվա ընթացքում Հայաստանի արտաքին պետական պարտքը ոչ միայն չի աճել, այլև նվազել է։ Կտրուկ բարձրացել է վերամշակող արդյունաբերության արտադրանքի արտահանումը և առաջին 1 տարվա համար շատ կարևոր ցուցանիշ է»,- «Առաջին լրատվական»-ի տաղավարում քննարկման ժամանակ ասաց ԱԺ «Իմ քայլը» խմբակցության պատգամավոր Հայկ Գևորգյանը։
Քննարկմանը մասնակցող «Տնտեսական իրավունքի կենտրոն» ՀԿ նախագահ Մովսես Արիստակեսյանը համաձայնեց Գևորգյանի հետ, որ ներկա կառավարության տնտեսական քաղաքականությունը աճի միտումներ է ցույց տալիս, բայց լավ կլիներ ունենալ տնտեսական ռազմավարական ծրագիր՝ ավելի երկարաժամկետ կտրվածքով։
Արիստակեսյանի համար զարմանալի է, որ ներկա կառավարությանը քննադատում են Քոչարյանի կողմնակիցները՝ վկայակոչելով Քոչարյանի պաշտոնավարման տարիների երկնիշ տնտեսական աճը, որի ներառականությունը պարզ չ։ «Քոչարյանական թիմի կողմից դրա մասին խոսելով՝ խոստովանում են, որ իրենց ստեղծած կշռաքարերով հիմա փորձում են խոչընդոտել ներկա տնտեսական զարգացման դրական միտումները։ Նրանք խոսում են իրենց «վագրային թռիչքների» մասին, բայց իմ ձեռքի տակ առկա այդ ժամանակահատվածում Համաշխարհային բանկի պատվերով կատարված մի հետազոտություն, որտեղ խոսվում է Քոչարյանի ժամանակվա շինարարական փուչիկի մասին։ Քոչարյանը այդ տարիներին ասում էր՝ ահա, տեսնում եք մեր տնտեսական աճի մուլտիպլիկատիվ էֆեկտը, բայց այդ մուլտիպլիկատիվ էֆեկտը եղավ ոչ միայն հանրային կյանքի վրա, այլ եղավ իրենց անձնական և կոլեկտիվ կյանքի վրա։ Կապիտալիզացվեցին անշարժ գույքի տարբեր տեսակներ, հոսեցին երկրից։ Այդ տարիներին անկախ փորձագետների գնահատմամբ երկրից հոսել էր 10 միլիարդ դրամ»,- ասաց Արիստակեսյանը՝ հավելելով, որ ուշագրավն այն էր, որ «վագրային թռիչքից» հետո տնտեսական ճգնաժամ սկսվեց։ «Բայց չկար տնտեսական աճ, Գյուլնազ տատի հեքիաթներն էին պատմում «վագրային թռիչքների» մասին։ Ամբողջ օլիգարխիկ իշխանությունն օգտագործվում էր անձնական և կոլեկտիվ շահերի սպասարկման համար՝ չապահովելով երկրի տնտեսության համար որևէ բան»,- ասաց Արիստակեսյանը։
Առավել մանրամասն՝ տեսանյութում։